Ish-kryeministrja e Bangladeshit, Sheikh Hasina, është dënuar me vdekje nga një gjykatë në Daka për një shtypje vdekjeprurëse të protestave antiqeveritare vitin e kaluar.

Duke folur nga mërgimi në Indi, Hasina e hodhi poshtë vendimin si “të motivuar politikisht”.

Qeveria e përkohshme e vendit e përshkroi vendimin e së hënës si “historik”, duke u bërë thirrje njerëzve të qëndrojnë të qetë, të përmbajtur dhe të përgjegjshëm. Ky vendim vjen në një kohë kur siguria në të gjithë Bangladeshin është rritur, me gaz lotsjellës që është përdorur në rrugët e Dakës për të shpërndarë protestuesit.

Hasina, ministrja e saj e brendshme dhe shefi i policisë u shpallën të gjithë fajtorë. Midis të pandehurve, vetëm ish-shefi i policisë Abdullah al-Mamun ishte i pranishëm në dhënien e dënimit.

Kombet e Bashkuara vlerësojnë se deri në 1,400 njerëz vdiqën në protestat e udhëhequra nga studentët vitin e kaluar , shumica nga të shtënat me armë zjarri nga forcat e sigurisë.

Aktivistja e të drejtave të njeriut Shireen Huq thotë se “ndëshkimi i ashpër” për Hasinën nuk do t’u ofrojë ngushëllim familjeve të të vrarëve dhe të plagosurve gjatë protestave të vitit të kaluar. “Ata kurrë nuk do të jenë në gjendje ta falin atë”, shton Huq.