Ministri i Jashtëm i Italisë, Antonio Tajani i ka bërë thirrje homologut të tij izraelit, Israel Katz, të ndalojë aksionin ushtarak në Rafah, në Rripin jugor të Gazës.
Tajani theksoi rëndësinë e armëpushimit dhe aksesit humanitar në Gaza gjatë një bisede telefonike me Katz, thuhet në një deklaratë të lëshuar nga kryediplomati italian pas bisedimeve të tij me homologun izraelit.
“Qeveria e Italisë i bën thirrje Izraelit t’i japë fund aksionit ushtarak në Rafah. Hamasi duhet të lirojë menjëherë pengjet. Armëpushimi dhe aksesi humanitar në Gaza janë të nevojshme,” tha ai.
Italia “luan një rol udhëheqës në përpjekjet humanitare me iniciativën “Ushqimi për Gazën”, shtoi ajo.
Izraeli ka goditur Rripin e Gazës pas sulmit ndërkufitar të grupit palestinez të rezistencës Hamas më 7 tetor 2023, i cili vrau rreth 1200 njerëz.
Më shumë se 35,200 palestinezë janë vrarë që atëherë në Rripin e Gazës, kryesisht gra dhe fëmijë, dhe mbi 79,000 janë plagosur, sipas autoriteteve shëndetësore palestineze.
Në Bregun Perëndimor, rreth 500 palestinezë janë vrarë dhe mijëra të plagosur që atëherë, së bashku me fushatat e përditshme të arrestimeve nga ushtria izraelite.
Izraeli akuzohet për “gjenocid” në Gjykatën Ndërkombëtare të Drejtësisë, e cila ka urdhëruar Tel Avivin të sigurojë që forcat e tij të mos kryejnë akte gjenocidi dhe të marrin masa për të garantuar ofrimin e ndihmës humanitare për civilët në Gaza.
(A.A/BalkanWeb)
