Izraeli ka shkatërruar më shumë se 1,500 ndërtesa në zonat e Gazës që ndodhen nën kontrollin e tij që nga fillimi i armëpushimit me Hamasin më 10 tetor, sipas imazheve satelitore të analizuara nga BBC Verify.

Fotot më të fundit, të marra më 8 nëntor, tregojnë se lagje të tëra të kontrolluara nga Forcat Mbrojtëse të Izraelit (IDF) janë rrafshuar me tokë brenda më pak se një muaji, me sa duket përmes prishjeve të qëllimshme. BBC paralajmëron se numri real i ndërtesave të shkatërruara mund të jetë edhe më i lartë, për shkak të mungesës së imazheve për disa zona.

Disa ekspertë ndërkombëtarë argumentojnë se këto veprime mund të përbëjnë shkelje të kushteve të armëpushimit të ndërmjetësuar nga SHBA, Egjipti, Katari dhe Turqia. Megjithatë, një zëdhënës i IDF-së i tha BBC Verify se ushtria “po vepron në përputhje me kuadrin e armëpushimit”.

Sipas planit 20-pikësh të paqes të presidentit amerikan Donald Trump për Gazën, që përbën bazën e armëpushimit, “të gjitha operacionet ushtarake, përfshirë bombardimet ajrore dhe të artilerisë, do të pezullohen”. Trump ka përsëritur disa herë se “lufta ka mbaruar”.

Ekipi i BBC Verify përdori një algoritëm të zbulimit të ndryshimeve për të analizuar imazhe radarike para dhe pas armëpushimit, duke identifikuar zona me shenja të qarta shkatërrimi. Shumë prej ndërtesave të prishura, veçanërisht në lindje të Khan Younis dhe Abasan al-Kabira, nuk dukeshin të dëmtuara më parë.

Në pamjet para prishjeve shihen shtëpi me kopshte, pemë dhe pemishte të vogla — elemente që tashmë janë zhdukur plotësisht.

Sipas marrëveshjes së tetorit, Izraeli duhej të tërhiqte forcat e tij përtej të ashtuquajturës “Vijë e Verdhë”. Por IDF argumenton se veprimet e saj janë pjesë e “çmontimit të infrastrukturës terroriste”, përfshirë tunelet dhe objektet ushtarake të Hamasit.

Ministri izraelit i Mbrojtjes, Israel Katz, ka deklaruar në platformën X më 18 tetor se “demilitarizimi i Gazës dhe shkatërrimi i tuneleve të terrorit” janë pjesë thelbësore e politikës së sigurisë së Izraelit.