Operacionet ushtarake të ushtrisë izraelite në territorin libanez kanë arritur kulmin, ndërsa shtabi i përgjithshëm njoftoi neutralizimin e dhjetëra anëtarëve të Hezbollahut gjatë përleshjeve të fundit.

Sipas ushtrisë izraelite, luftimet janë përqendruar në zonën strategjikisht të rëndësishme të Rab el-Talathin, ku njësitë tokësore kanë kryer operacione intensive kundër pozicioneve të organizatës.

Raportet zyrtare bëjnë me dije se gjatë operacionit janë shkatërruar disa objekte të rëndësishme të Hezbollahut, përfshirë depo municionesh, qendra kontrolli dhe pozicione nga ku monitoroheshin lëvizjet e forcave izraelite.

Sipas gazetës “Times of Israel”, qëllimi kryesor i operacionit, i cili nisi javën e kaluar në perëndim të Lartësive të Golanit, është largimi i plotë i militantëve të mbështetur nga Irani nga zona kufitare me Izraelin.

Ndërkohë, udhëheqja ushtarake izraelite po përforcon më tej frontin verior. Në ditët në vijim pritet të vendosen përforcime të konsiderueshme, përfshirë brigadën elitare Golani, e cila do t’i bashkohet forcave që operojnë në rajon.

Sipas informacioneve të publikuara nga faqja Axios, plani ushtarak i Izraelit mund të jetë edhe më i gjerë, pasi synohet marrja nën kontroll e gjithë zonës në jug të lumit Litani, me qëllim çmontimin e infrastrukturës ushtarake të Hezbollahut.