Izraeli po kërkon të përkeqësojë situatën humanitare në Rripin e Gazës të shkatërruar nga lufta duke mbyllur pikën kufitare Rafah, tha një autoritet lokal në enklavën palestineze.
“Në vazhdim të luftës gjenocidale të ushtrisë okupatore izraelite kundër popullit tonë palestinez në të gjithë Rripin e Gazës, okupimi vendosi të përkeqësojë realitetin humanitar në Gaza”, tha në një deklaratë Zyra e Mediave të Qeverisë me bazë në Gaza.
Ushtria izraelite ndaloi hyrjen e ndihmave humanitare duke mbyllur vendkalimet Rafah dhe Karm Abu Salem.
Në 12 orët e fundit, thuhet në deklaratë, ushtria izraelite ka vrarë më shumë se 35 palestinezë.
“Situata nuk është vetëm katastrofike në Rafah, por shtrihet në të gjitha zonat e Rripit të Gazës që vuajnë një situatë tragjike të urisë sistematike”, thuhet në deklaratë.
Zyra bëri thirrje për “një ndërhyrje të menjëhershme ndërkombëtare ” për të ndaluar agresionin e Izraelit.
Ushtria izraelite tha se forcat e saj kanë marrë kontrollin e anës palestineze të pikës kufitare Rafah me Egjiptin .
Zëdhënësi i autoritetit të kalimit kufitar palestinez konfirmoi më herët se kufiri ishte i mbyllur nga pala palestineze.
Videoja e shpërndarë nga mediat izraelite, duke përfshirë Times of Israel, tregonte një tank izraelit në vendkalimin Rafah.
Pas njoftimit të grupit palestinez të Hamasit për pranimin e një propozimi Katar-Egjiptian për një armëpushim në Gaza, Kabineti i Luftës i Izraelit vendosi të vazhdojë me një operacion në Rafah.
Ushtria izraelite lëshoi urdhra të menjëhershëm evakuimi të hënën herët për palestinezët në lagjet lindore të Rafah dhe u bëri thirrje atyre të lëvizin në qytetin al-Mawasi në Gazën jugore.
Rafah është shtëpia e më shumë se 1.5 milionë palestinezëve të zhvendosur që janë strehuar nga lufta e nisur nga Izraeli pas sulmit të 7 tetorit nga Hamasi që vrau afro 1,200 njerëz.
Që atëherë, sulmi izraelit ka vrarë më shumë se 34,780 palestinezë, kryesisht gra dhe fëmijë, përveçse ka shkaktuar një katastrofë humanitare.
Gati shtatë muaj pas luftës izraelite, zona të gjera të Gazës ishin në gërmadha, duke shtyrë 85% të popullsisë së enklavës në zhvendosje të brendshme mes një bllokade gjymtuese të ushqimit, ujit të pastër dhe ilaçeve, sipas OKB-së.
Izraeli akuzohet për gjenocid në Gjykatën Ndërkombëtare të Drejtësisë. Një vendim i përkohshëm në janar tha se është “e besueshme” që Izraeli po kryen gjenocid në Gaza dhe urdhëroi Tel Avivin të ndalojë akte të tilla dhe të marrë masa për të garantuar ofrimin e ndihmës humanitare për civilët atje.
(A.A/BalkanWeb)
