Në fund të muajit shtator në Japoni do të hiqet gjendja e jashtëzakonshme e aplikuar në 19 provinca kundër koronavirusit të ri (COVID-19).
Anëtari i kabinetit përgjegjës për masat ndaj COVID-19, Yasutoshi Nishimura, në konferencën për media tha se kishte një “përmirësim” në lidhje me gjendjen e rasteve.
“Në gjithë vendin (numri i rasteve) është duke shënuar rënie dhe është përmirësuar gjendja edhe në Tokio”, tha Nishimura.
Sipas lajmit të agjencisë Kyodo, e cila bazohet në burimet qeveritare, thuhet se gjendja e jashtëzakonshme në vend do të hiqet pas rënies së numrit të rasteve me COVID-19.
Në fillim të javës së ardhshme, kryeministri Yoshihide Suga do të diskutojë për situatën e fundit të pandemisë me ministrin e Shëndetësisë, Tamura Norihisa dhe anëtarin e kabinetit Nishimura.
Pas prononcimit të Bordit Këshillimor të qeverisë lidhur me COVID-19, kryeministri Suga do të shpallë vendimin zyrtar mbi gjendjen e jashtëzakonshme brenda javës së ardhshme.
Gjendja e jashtëzakonshme është aktualisht në fuqi në 19 provinca, përfshirë kryeqytetin Tokio dhe metropolet përreth.
Në Japoni numri i rasteve me COVID-19 arriti në 1.681.794 ndërsa numri i viktimave në 17.297.
Në gjithë vendin gjithsej 1.429 persona janë nën kujdes intensiv.//AA
