Irani ndodhet “në gjendje lufte” dhe do të veprojë me vendosmëri kundër çdo personi që vepron kundër interesave të Republikës Islamike, deklaroi kreu i gjyqësorit iranian. Sipas agjencisë së lajmeve Mizan, kryetari i gjyqësorit, Gholam-Hossein Mohseni Ejei, bëri thirrje për qëndrim të ashpër ndaj çdo veprimi apo deklarate që, sipas tij, përputhet me “interesat e paligjshme të armikut agresor”.

“Jemi në gjendje lufte”, u shpreh ai në ditën e pestë të konfliktit. “Ata që veprojnë në çfarëdo mënyre, me fjalë ose vepra, në përputhje me interesat e paligjshme të armikut agresor, do të trajtohen me vendosmëri dhe ashpërsi, në përputhje me ligjet dhe rregulloret në fuqi.”

Mohseni Ejei njihet si një figurë kyçe e sistemit gjyqësor iranian dhe është kritikuar nga organizata ndërkombëtare të të drejtave të njeriut për rolin e tij në shtypjen e protestave dhe mbështetjen e dënimeve të ashpra, përfshirë dënimin me vdekje. Deklaratat e tij vijnë në një moment tensioni të lartë, ndërsa autoritetet iraniane paralajmërojnë masa të forta kundër çdo veprimi që konsiderohet si bashkëpunim me kundërshtarët e vendit.