Kryeministri i Greqisë, Alexis Tsipras ka njoftuar se Turqia ka liruar nga burgu dy ushtarë grekë, të cilët ishin arrestuar më 1 mars, për shkak se kishin kaluar ilegalisht kufirin mes dy vendeve.

Tsipras e cilësoi këtë vendim si “akt të drejtësisë”, që do të rrisë miqësinë mes dy vendeve.

Përmes një deklarate, kryeministri Tsipras ka falënderuar dy ushtarët dhe familjet e tyre për “këmbënguljen dhe durimin” e tyre, derisa ushtarët po mbaheshin në një burg në qytetin turk, Edirne.

Burgosja e dy ushtarëve grekë nga autoritetet turke rriti tensionet mes dy shteteve fqinje.

Greqia ka deklaruar se ushtarët kanë kaluar gabimisht vijën kufitare dhe kanë hyrë në territorin turk, teksa kanë qenë duke ndjekur gjurmët e migrantëve që hyjnë ilegalisht në territorin e tyre, njofton REL.

Një gjykatë në Turqi, që ka urdhëruar lirimin e dy ushtarëve, ka thënë se ata akuzoheshin për kalim ilegal të kufirit dhe përpjekje për spiunazh ushtarak.

(BalkanWeb)