Nepali vijon të përballet me pasojat e një prej katastrofave më të rënda natyrore të viteve të fundit. Përmbytjet e menjëhershme dhe rrëshqitjet masive të dheut në rajonin malor pranë kufirit me Kinën kanë shkaktuar të paktën 903 viktima, ndërsa mijëra persona vijojnë të rezultojnë të zhdukur.

Sipas bilancit të fundit të përkohshëm, rreth 4,247 persona, përfshirë edhe shtetas të huaj, janë ende të zhdukur në të dyja anët e kufirit, në një zonë të vështirë të Himalajeve që frekuentohet nga alpinistë dhe pelegrinë.

Fatkeqësia ka prekur edhe Tibetin, në Kinë, ku deri tani janë gjetur 16 viktima, ndërsa 546 persona rezultojnë të zhdukur. Presidenti kinez Xi Jinping ka urdhëruar autoritetet të intensifikojnë përpjekjet për gjetjen e të zhdukurve.

Varrosen viktimat e paidentifikuara

Përmasat e tragjedisë kanë krijuar një situatë të jashtëzakonshme për autoritetet nepaleze. Familjarë të personave të zhdukur janë dyndur në spitale dhe morgje në përpjekje për të identifikuar të afërmit e tyre.

Në Bharatpur, fotot e viktimave shfaqen në ekrane, ndërsa trupat e nxjerrë nga balta dhe mbeturinat po transportohen nga zona të ndryshme të prekura nga katastrofa. Vetëm në rajonin e Chitwan janë transportuar rreth 250 trupa, disa prej tyre më shumë se 100 kilometra larg vendit ku u gjetën.

Për shkak të rrezikut për shëndetin publik dhe gjendjes së rënduar të trupave, autoritetet kanë nisur varrosjen e viktimave edhe pa identifikimin e tyre. Për viktimat hindu, varrimet janë konsideruar të përkohshme, ndërsa autoritetet kanë ruajtur mostra ADN-je në mënyrë që familjet të mund t’i identifikojnë më vonë dhe të kryejnë ritet tradicionale.

Në Devgad, trupat e paidentifikuar janë varrosur në varre të shënuara me numra, në pritje të identifikimit zyrtar.

Shpresa për 100 punëtorët e bllokuar në tunel

Ndërkohë, operacionet e kërkim-shpëtimit vijojnë mes kushteve jashtëzakonisht të vështira. Ekipet po përpiqen të arrijnë rreth 100 punëtorë, të cilët dyshohet se janë bllokuar brenda një tuneli në kompleksin hidroelektrik Trishuli 3A.

Autoritetet nuk kanë mundur të vendosin kontakt me ta, por ekipet e shpëtimit kanë krijuar një pusetë dhe po përpiqen të hapin një kalim drejt tunelit. Në operacion pritet të përdoren edhe mjete shpërthyese, ndërsa ekipet do të hyjnë me pajisje dhe maska oksigjeni.

Rreth 80 punonjës të emergjencave nga Nepali janë angazhuar në operacion, me mbështetjen e ekipeve nga India, Kina dhe Koreja e Jugut.

Megjithatë, pesë ditë pas katastrofës, shpresat për të gjetur të mbijetuar në zonat e mbuluara nga balta dhe mbeturinat po zbehen.

Një katastrofë e përmasave të jashtëzakonshme

Ekspertët ia atribuojnë katastrofën shembjes së një akullnaje masive, e cila në pak çaste shndërroi një rrjedhë të qetë uji në një torrent shkatërrues. Fshatra të tëra janë dëmtuar rëndë, ndërsa infrastruktura është përfshirë nga balta, gurët dhe mbeturinat.

Ekipet e shpëtimit vijojnë të punojnë nën kërcënimin e rrëshqitjeve të reja dhe rritjes së nivelit të ujërave. Në anën kineze, ekipet u detyruan të tërhiqeshin përkohësisht drejt një zone më të sigurt pasi një liqen i ri u formua pas një rrëshqitjeje dheu.

Në Nepal, autoritetet kanë paralajmëruar për rritje të nivelit të ujit në lumin Botekosi.

Mes mijëra të zhdukurve janë edhe qindra të huaj. Për familjet e tyre, operacionet e kërkim-shpëtimit mbeten shpresa e fundit për të mësuar fatin e të dashurve të tyre.