Tre turistë spanjollë dhe një afgan u qëlluan për vdekje të premten vonë në Bamiyan, një qytet që tërheq vizitorë të huaj në Afganistanin qendror, thanë burime zyrtare në Kabul dhe Madrid.
Sulmi vdekjeprurës është i pari kundër turistëve të huaj në Afganistan që nga kthimi i talebanëve më 15 gusht 2021.
“Tre të huaj dhe një afgan u vranë”, ndërsa një tjetër “katër të huaj dhe tre afganë u plagosën” nga të shtënat me armë zjarri, tha zëdhënësi i Ministrisë së Brendshme afgane, Abdul Mateen Khani, pa specifikuar nëse sulmi kishte një apo më shumë sulmues.
Në Madrid, një burim i AFP në ministrinë e jashtme të Spanjës konfirmoi mbrëmë se të tre të huajt që vdiqën kishin nënshtetësinë spanjolle.
“Tre spanjollë janë vrarë dhe të paktën një është plagosur nga plumbat në Afganistan”, tha burimi, i cili foli në kushte anonimiteti.
“Ministria po punon (…) për të sqaruar rrethanat, për të ndihmuar viktimat dhe për të komunikuar për familjet e tyre,” shpjegoi ajo.
Nga ana e tij, kryeministri i Spanjës, Pedro Sanchez, tha se ishte i “tronditur” nga “vrasja” e turistëve spanjollë dhe siguroi se po “monitoronte nga afër situatën”.
Në Kabul, zëdhënësi i ministrisë së brendshme tha se katër të dyshuar ishin arrestuar, pa dhënë detaje.
Të plagosurit janë shtetas të Norvegjisë, Australisë, Lituanisë dhe Spanjës, sipas informacioneve nga një burim në një spital afgan.
“Dëgjova disa të shtëna,” tha një banor, i cili nuk pranoi të jepte emrin e tij, duke shtuar se “forcat e sigurisë bllokuan menjëherë rrugët që të çojnë” në vendin e sulmit, pranë tregut kryesor të Bamiyan.
