Komandanti i KFOR-it, gjeneralmajor Enrico Barduani, ka realizuar sot një vëzhgim ajror të kufirit Kosovë-Serbi me një helikopter të tipit H145, i cilësuar si pjesë e Detashmentit të Aviacionit të KFOR-it.

Ky vëzhgim ka për qëllim të rrisë kapacitetet e misionit të KFOR-it në fushën e Inteligjencës, Mbikëqyrjes dhe Zbulimit.

Në një njoftim të shpërndarë për mediat, KFOR-i theksoi se ky operacion fluturimi është një hap tjetër në forcimin e sigurisë dhe garantimin e lirisë së lëvizjes për të gjithë qytetarët e Kosovës, pa marrë parasysh përkatësinë e tyre etnike.

Gjithashtu, KFOR-i vazhdon bashkëpunimin e ngushtë me Policinë e Kosovës dhe Misionin e Bashkimit Evropian për Sundimin e Ligjit (EULEX), për të siguruar implementimin e rolit të tij në mbrojtjen dhe stabilizimin e situatës në Kosovë.