Udhëheqësi Suprem i Iran, Ajatollah Ali Khamenei, dërgoi mesazhe të forta ndaj presidentit amerikan Donald Trump të martën, pak para fillimit të bisedimeve mes SHBA-së dhe Iranit në Gjenevë.
Në fjalimin e tij, Khamenei iu referua deklaratave të Trump, i cili disa ditë më parë tha se ndryshimi i regjimit iranian “do të ishte gjëja më e mirë që mund të ndodhte”.

“Presidenti amerikan tha se për 47 vjet Amerika nuk ka arritur ta eliminojë Republikën Islamike. Unë ju them: as ju nuk do të keni sukses,” tha Khamenei, duke iu përgjigjur deklaratës së Trump dhe duke theksuar se forcat amerikane, përfshirë aeroplanmbajtëset, nuk mund të ndryshojnë fatin e Iranit.

Ai gjithashtu shtoi: “Ushtria më e fortë në botë ndonjëherë mund të marrë një goditje të tillë sa nuk do të jetë në gjendje të qëndrojë. Shumë mirë, një aeroplanmbajtëse është e rrezikshme, por më e rrezikshme se ajo është arma që mund ta zhysë atë në fund të detit.”. Khamenei paralajmëroi se çdo negociatë për energjinë bërthamore nuk duhet të ketë paracaktuar rezultatin dhe se Irani nuk do t’i nënshtrohet udhëheqësve amerikanë që ai i përshkroi si të korruptuar.

Fjalimi përfundoi me një thirrje për mëshirë dhe falje për pjesëmarrësit e “gabuar” në protestat e mëparshme, të cilat udhëheqësi iranian i paraqiti si pjesë të një plani armik të jashtëm dhe jo si lëvizje proteste të brendshme. Mesazhet e Khamenei vijnë në një kohë kur bisedimet SHBA-Iran në Gjenevë priten të fokusohen mbi programin bërthamor dhe çështje të sigurisë rajonale, ndërsa tensionet diplomatike mes dy vendeve mbeten të larta.