Kirurgë nga Skocia dhe SHBA-ja kanë kryer me sukses atë që besohet të jetë operacioni i parë në botë për goditje në tru nga distanca duke përdorur teknologji robotike , raportoi BBC të hënën.
Prof. Iris Grunwald e Universitetit të Dundee-së kreu një trombektomi në distancë – heqjen e një mpiksjeje gjaku pas një goditjeje në tru – në një kufomë njerëzore të dhuruar për shkencën mjekësore. Grunwald operoi nga Spitali Ninewells në Dundee, ndërsa trupi ndodhej në anën tjetër të qytetit, në universitet.
Orë më vonë, Ricardo Hanel, një neurokirurg me bazë në Florida, kreu procedurën e parë robotike transatlantike nga zyra e tij në Jacksonville mbi një trup njerëzor në Dundee, më shumë se 4,000 milje (6,400 kilometra) larg.
Ekipi e përshkroi arritjen si një “ndryshues të mundshëm të lojës” nëse miratohet për përdorim klinik, duke thënë se mund të revolucionarizojë kujdesin për goditjen në tru duke u lejuar specialistëve të trajtojnë pacientët nga distanca.
Vonesat në arritjen e qendrave të specializuara të trajtimit mund të ndikojnë ndjeshëm në rezultatet e rikuperimit. Ekspertët thanë se sistemet robotike mund të ndihmojnë në mbylljen e këtij boshllëku, veçanërisht në zonat e largëta ose të pashërbyera.
Prof Grunwald tha: “Ndjeheshim sikur po shihnim pamjen e parë të së ardhmes. Aty ku më parë kjo mendohej të ishte fantastiko-shkencore, ne demonstruam se çdo hap i procedurës mund të bëhet tashmë.”
Universiteti i Dundee-t, një qendër globale trajnimi për Federatën Botërore për Trajtimin Ndërhyrës të Goditjes në Tru, është i vetmi institucion në Mbretërinë e Bashkuar ku mjekët mund të operojnë kufoma me lëng që qarkullon nëpër enë për të imituar rrjedhën e gjakut tek njerëzit.
“Kjo ishte hera e parë që ne mundëm të kryenim të gjithë procedurën mekanike të trombektomisë në një trup të vërtetë njerëzor për të treguar se të gjitha hapat e procedurës janë të mundura”, tha Grunwald.
Juliet Bouverie, drejtore ekzekutive e Shoqatës së Goditjes në Tru, e quajti operacionin transatlantik “një risi të jashtëzakonshme”.
“Për një kohë shumë të gjatë, njerëzit që jetojnë në zona të largëta dhe rurale janë privuar nga qasja në trombektomi,” tha ajo. “Robotikë të tillë mund të ribalancojnë pabarazinë që ekziston në trajtimin e goditjes në tru në të gjithë Mbretërinë e Bashkuar.”
Studiuesit thanë se suksesi i provave mund të hapë rrugën për miratimin global të kujdesit në distancë për goditjen në tru, duke u lejuar pacientëve në rajone të izoluara të marrin trajtim shpëtues jetësh pa udhëtuar në distanca të gjata.
