Kryebashkiakja e Shkodrës, Voltana Ademi ka reaguar pas ndarjes nga jeta të kirurges në Shkodër Zyliha Kraja, pasi humbi betejën me koronavirusin.

“Lamtumirë doktoreshë Zyli!

I është dhënë lamtumira e fundit Doktoreshë Zylit, kirurges me zemër të madhe dhe përkushtim të rrallë. Përfaqësuese e brezit të artë të mjekëve shkodranë, që në kushte aspak të lehta, shëruan pacientët e tyre pikë së pari me humanizmin e tyre dhe më pas me profesionalizimin e përkushtimin e spikatur.

Doktoreshë Zyli i shërbeu pacientëve deri në ditët e fundit të jetës, edhe pse kishte shumë vite që kishte mbushur moshën e pensionit.

Një humbje e madhe për bashkëshortin e saj, dramaturgun e përmasave ndërkombëtare Fadil Kraja, familjen e saj, kolegët, miqtë, Shkodrën dhe të gjithë ata, që falë Doktoreshë Zylit dhe punës së saj, janë sot shendetplotë.

Pushofsh në paqe Doktoreshë Zyli! Do të na mungosh të gjithëve”, shkruan Ademi.