Anija transportuese e automjeteve Ro-Ro “Neptune Ethos”, e cila kishte ngecur në një zonë me taban ranor në Kamatero, në Salaminë, është shkëputur dhe po tërhiqet drejt ankorimit të Elefsinës.

Sipas përditësimit të fundit nga Roja Bregdetare greke, anija u shkëput pas kontrollit të kryer nga një ekip zhytësish. Aktualisht ajo po shoqërohet nga një anije e Rojës Bregdetare, ndërsa kushtet e motit në zonë janë të mira. Kompania Neptune Lines bëri të ditur se të gjithë personat në bord janë të sigurt dhe në gjendje të mirë shëndetësore. Sipas kompanisë, nga incidenti nuk ka pasur ndotje detare dhe nuk paraqitet rrezik për mjedisin.

Në bordin e “Neptune Ethos” ndodhen gjithsej 36 persona, mes tyre 27 anëtarë të ekuipazhit dhe nëntë pjesëtarë të një ekipi privat riparimi. Neptune Lines deklaroi gjithashtu se që prej momentit të incidentit ka pasur bashkëpunim të ngushtë me autoritetet portuale dhe ekipet e specializuara, me qëllim menaxhimin e sigurt të situatës dhe zbatimin e procedurave të përcaktuara të sigurisë.