Koalicioni i milicisë iraniane në Irak ka akuzuar Shtetet e Bashkuara për shënjestrimin e anëtarëve të Forcave të Mobilizimit Popullor (PMF) dhe një konvoji që transportonte pelegrinë drejt Qerbelasë, duke pretenduar se sulmet lanë dhjetëra të vrarë dhe të plagosur.
Në një deklaratë të publikuar të mërkurën, koalicioni i milicive të mbështetura nga Irani, i lidhur ngushtë me grupin ombrellë PMF, akuzoi gjithashtu Arabinë Saudite se po vepron si aleate e Shteteve të Bashkuara në këto operacione.

Grupi i vendosi autoriteteve irakiane afat deri më 7 gusht për t’iu përgjigjur incidentit, duke paralajmëruar se në të kundërt do të ndërmarrë veprime të drejtpërdrejta.
Në deklaratë thuhet se përgjigjja ndaj SHBA-së mund të përfshijë edhe objektiva në Arabinë Saudite, megjithatë theksohet se do të shmanget çdo veprim që mund të pengojë pelegrinazhin e Arbainit. Arbaini shënon fundin e periudhës 40-ditore të zisë për Imam Huseinin, nipin e Profetit Muhamed dhe një nga ngjarjet më të rëndësishme fetare për myslimanët shiitë.

Ndërkohë, kryetari i Parlamentit irakian, Haibat al-Halbousi, dënoi sulmet amerikane dhe saudite, duke i bërë thirrje qeverisë dhe kryeministrit të Irakut të zhvillojnë një hetim të plotë dhe transparent.
Ai kërkoi gjithashtu marrjen e të gjitha masave diplomatike dhe ligjore për mbrojtjen e të drejtave dhe sovranitetit të Irakut, si dhe identifikimin dhe vënien para përgjegjësisë të çdo pale të përfshirë në akte armiqësore që burojnë nga territori irakian kundër vendeve fqinje, në përputhje me ligjin.