Chuck Norris do të mbahet mend përgjithmonë nga publiku përmes paraqitjeve të tij ikonike në film dhe televizion, siç është roli i tij si sherifi që lufton krimin në serialin “Walker, Texas Ranger”.

Megjithatë, për shumë të rinj, aktori i ndjerë njihet kryesisht përmes një “roli” krejtësisht të ndryshëm: atij të protagonistit në mijëra meme online.

Lindja e një fenomeni
Të ashtuquajturat “fakte” rreth Chuck Norris filluan në forumet online në fillim të viteve 2000. Ato evoluan shpejt në një zhanër të veçantë humori, i cili deri në vitet 2010 kishte përmbytur internetin. Këto shaka e paraqisnin aktorin si një figurë mbinjerëzore, pothuajse si perëndi, të aftë për çdo gjë.

Citate të tilla si “Chuck Norris kalon një test shikimi me sy mbyllur”, “kur Hulk zemërohet shumë, ai shndërrohet në Chuck Norris” ose “gripi vaksinohet çdo vit për t’u mbrojtur nga Chuck Norris” u bënë virale, duke i dhënë aktorit një karrierë të dytë, të papritur – këtë herë në botën dixhitale.

Popullariteti i Norris daton dekada më parë, në vitet 1970 dhe 1980, kur ai u afirmua si një yll i filmave aksion. Ai luajti në produksione të tilla si “Missing in Action”, ndërsa paraqitja e tij përkrah Bruce Lee në “The Ëay of the Dragon” e bëri atë gjerësisht të njohur.
Edhe pse karriera e tij në film dhe televizion gradualisht ra, memet e mbajtën atë aktual. “Ai ishte kudo”, kujton Stephen Goodëin, një adhurues i memeve.

Për shumë të rinj, imazhi i aktorit është i kufizuar vetëm në këto meme.

“Për brezin tim, memet ishin në thelb e tëra çfarë dinim për të”, thotë një 25-vjeçar. “Ai i përshtatej stereotipit të djalit të ashpër në filmat aksion, por vështirë se mund të përmendje një film të tijin.”
Memet u përhapën me shpejtësi me rritjen e mediave sociale. Në platforma si Facebook dhe Tëitteri i atëhershëm, imazhet e Norrisit me një sjellje të ashpër dhe me mesazhe të shkurtra sarkastike u bënë një dukuri e përditshme. “Kudo që shkoje, shihje këto shaka”, kujton një 27-vjeçar. “Qeshja, edhe pse as nuk e dija kush ishte.”

Nga fëmijëria në internet sot
Disa njerëz kujtojnë se janë ekspozuar ndaj meme-ve që në shkollën fillore. “Kur po mësonim për rrotullimin e Tokës, dikush tha se Toka po rrotullohej sepse Chuck Norris vraponte shumë shpejt”, thotë një përdorues tjetër. “Ne po qeshnim në atë kohë, por unë nuk kisha idenë se kush ishte në të vërtetë.”

Edhe pse intensiteti i fenomenit ka rënë vitet e fundit, shakatë nuk janë zhdukur. Në disa cepa të internetit ato mbeten gjallë, me faqe që vazhdojnë të publikojnë përmbajtje relevante çdo ditë.

Epoka e re e memeve
Sot, “faktet” e Chuck Norris kanë hyrë në një fazë të re, pasi ato kombinohen me inteligjencën artificiale. Imazhet e reja krijohen në mënyrë dixhitale, por ruajnë të njëjtin humor që i bëri të famshme.
Vetë Norris dukej se ishte i vetëdijshëm dhe e shijonte këtë formë të veçantë të famës. Në intervista, ai lexonte shakatë dhe qeshte, duke demonstruar se ishte plotësisht i vetëdijshëm për imazhin që ishte krijuar rreth emrit të tij.