Një zyrtar i Hamasit deklaroi këtë të premte për Reuters se marrëveshja për çarmatimin e grupit duhet të zbatohet në mënyrë graduale dhe se hapi i parë i takon Izraelit.

Sipas zyrtarit, Izraeli duhet të fillojë zbatimin e fazës së parë të marrëveshjes menjëherë pasi të dyja palët të miratojnë tekstin përfundimtar. Kjo fazë përfshin tërheqjen e forcave izraelite nga Rripi i Gazës, si dhe çmontimin e grupeve të armatosura që Hamasi pretendon se mbështeten nga Izraeli.

Zyrtari shtoi se, pasi Izraeli të përmbushë detyrimet e fazës së parë dhe marrëveshja të miratohet zyrtarisht, Hamasi do t’ia dorëzojë armët Komitetit Kombëtar Palestinez për ruajtje.

Deklarata vjen në një kohë kur po vazhdojnë përpjekjet ndërmjetësuese për arritjen e një marrëveshjeje armëpushimi dhe çarmatimi në Gaza.