Një sipërmarrëse 22-vjeçare në Kenia ka zhvilluar një teknologji robotike që mund të shndërrojë të folurën e një mësuesi në gjuhën e shenjave, duke krijuar një mundësi të re për nxënësit e shurdhër dhe ata me dëgjim të dobët. Pajisja synon të lehtësojë përfshirjen e këtyre fëmijëve në arsim, veçanërisht në lëndë si matematika dhe shkencat.
Në Kenia jetojnë rreth 300 mijë fëmijë me dëmtim të dëgjimit, por vetëm një pjesë e vogël e tyre ndjekin arsimin në shkolla. Një nga vështirësitë kryesore lidhet me mungesën e një gjuhe të standardizuar të shenjave, gjë që e bën më të vështirë komunikimin mes mësuesve dhe nxënësve.
Projekti është krijuar nga Norah Kimathi, themeluese e kompanisë ZeroBionic. Synimi i saj është që nxënësit të mund të ndjekin mësimin edhe kur mësuesi nuk njeh gjuhën e shenjave. Krahu robotik prodhohet përmes teknologjisë së printimit 3D, duke përdorur mbetje plastike të ricikluara. Pajisja kushton rreth 350 dollarë dhe, sipas kompanisë, mund të funksionojë për rreth tre vjet pa mirëmbajtje. Deri tani janë shitur 78 njësi.
Sipas Kimathit, sistemi arrin një saktësi prej 92% në shndërrimin e gjuhës së folur në gjuhën e shenjave. Për zhvilluesit, sfida nuk ishte vetëm krijimi i mekanizmit robotik. Ekipi u përball edhe me mungesën e një baze të dhënash gjithëpërfshirëse për gjuhën afrikane dhe atë keniane të shenjave.
Për të zgjidhur problemin, ZeroBionic bashkëpunoi me edukatorë të shurdhër dhe persona me përvojë në gjuhën e shenjave. Lëvizjet e tyre u regjistruan përmes një kostumi të posaçëm të pajisur me elektroda, duke krijuar të dhënat e nevojshme për trajnimin e sistemit. “Askush tjetër nuk e kishte ndërtuar në kontinent, ne filluam nga e para”, tha Kimathi nga laboratori i saj në Nairobi.
Sipas saj, përpjekjet kanë vlejtur, pasi teknologjia synon t’u japë fëmijëve me dëmtim të dëgjimit më shumë mundësi për të ndjekur mësimin dhe për t’u përfshirë në sistemin arsimor. Hapi i radhës për ekipin është zhvillimi i “Africa One”, një sistem robotik për pjesën e sipërme të trupit që synon të zgjerojë ndjeshëm fjalorin e shenjave dhe të përmirësojë saktësinë e komunikimit.
