KORÇË- Policia e Korçës, me anë të një lajmërimi për mediat, ka dhënë detaje për krimin e dyfishtë të ndodhur në lagjen numër 10. Sipas policisë, një person ka qëlluar për vdekje një 40-vjeçar. Gazetarja Lorena Kodra raporton për Balkanweb se 40-vjeçari që ka humbur jetën është Emiljano Pine, që kishte edhe identitet tjetër, Jorgo Prifti. Pasi ka kryer vrasjen, autori është vetëvrarë. Autori është Ilo Lluka.
Njoftimi i policisë:
Më datë 28.02.2024, rreth orës 20:25, në lagjen nr. 18, Korçë, rruga “Koço Golniku”, një shtetas ende i paidentifikuar, dyshohet se ka qëlluar me armë zjarri shtetasin Emiliano Pine, rreth 40 vjeç, banues në Korçë, i cili ka humbur jetën gjatë transportimit për në spitalin e Korçës.
Autori i dyshuar i krimit, pasi ka qëlluar 40-vjeçarin, dyshohet se është vetëvrarë me armën e krimit. Shërbimet e Policisë kanë shkuar menjëherë në vendngjarje, ku kanë gjetur dhe sekuestruar në cilësinë e provës armën e krimit, gëzhojat. Gjithashtu janë administruar dhe po këqyren pamjet filmike nga kamerat e sigurisë.
Për këtë rast është krijuar një grup i posaçëm hetimor i cili po punon për zbardhjen dhe dokumentimin e plotë të ngjarjes, si dhe për identifikimin e autorit të ngjarjes.
(Balkanweb)
