Kryeministri grek Kyriakos Mitsotakis do të vizitojë Ankaranë në maj në përgjigje të vizitës së presidentit turk Rexhep Tajip Erdogan në Athinë dhjetorin e kaluar, tha kryeministri grek për radiostacionin Skai 100.3.

“Ne kemi ndërmarrë hapa shumë të rëndësishëm drejt afrimit të dy vendeve. Marrëdhëniet greko-turke janë në rrugën e normalizimit dhe ne duhet t’i ruajmë këto arritje”, tha Mitsotakis.

Për tre vitet e fundit, ka pasur një krizë të paprecedentë midis Greqisë dhe Turqisë, e cila është përkeqësuar vazhdimisht.

Tensionet u ulën pas tërmetit shkatërrues në Turqi më 6 shkurt 2023, kur Mitsotakis telefonoi menjëherë Erdoganin dhe premtoi të gjithë ndihmën e mundshme për të kapërcyer pasojat e tërmetit. Nga ana tjetër, Turqia shprehu ngushëllimet pas aksidentit të trenit në Greqi. Kjo bëri të mundur krijimin e një klime të re në marrëdhëniet mes dy vendeve.

Në Athinë më 7 dhjetor 2023 u zhvilluan negociatat mes Erdoganit dhe Mitsotakis dhe u mbajt takimi i Këshillit të Lartë të Bashkëpunimit. Si rezultat, u nënshkrua Deklarata e Marrëdhënieve Miqësore dhe Fqinjësisë së Mirë dhe 15 dokumente, marrëveshje, memorandume dhe deklarata të përbashkëta.