Kryeministri suedez të mërkurën e përshkroi etiketimin “diktator” të presidentit amerikan Donald Trump ndaj presidentit ukrainas Volodymyr Zelensky si “të pasaktë”.

Duke folur për mediat në Stokholm, Ulf Kristersson tha: “Presidenti Zelensky është zgjedhur në mënyrë demokratike. Unë mendoj se askush nuk dëshiron zgjedhje më shumë se Ukraina, sepse zgjedhjet do të nënkuptojnë se ka paqe në Ukrainë dhe se ata mund të drejtojnë përsëri vendin e tyre.”

“Për Ukrainën, Europa dhe bota janë aktualisht në një udhëkryq,” tha ai, duke shtuar: “Si do të përfundojë lufta kundër Ukrainës do të ndikojë dhe do të formësojë sigurinë e të gjithë Evropës për brezat që do të vijnë.”

Vërejtjet e tij erdhën pasi bisedimet e dyta urgjente të udhëhequra nga Franca për Ukrainën përfunduan mes shqetësimeve të shkaktuara nga bisedimet SHBA-Rusi.

Trump të mërkurën e quajti udhëheqësin ukrainas një “diktator pa zgjedhje” dhe paralajmëroi se “më mirë të lëvizë shpejt ose nuk do t’i mbetet një vend”.

Ai postoi në Truth Social disa orë pasi Zelenskyy u përgjigj në sugjerimin e tij se Kievi “nuk duhet ta kishte filluar kurrë” luftën, duke thënë se presidenti amerikan po jetonte në një “flluskë dezinformimi” rus.

Trump ka avancuar negociatat për t’i dhënë fund luftës trevjeçare në Ukrainë, pa pjesëmarrjen e Kievit dhe qeverive të tjera evropiane.

Ai tha se Evropa ka dështuar të sjellë paqen në Ukrainë dhe SHBA po negocionte me sukses një fund të luftës.

 

(A.A/BalkanWeb)