Suedia është në Botëror! Një ndeshje spektakolare në Solna e cila përfundoi 3-2 ndaj Polonisë, me skandinavët që sigurojnë biletën për në Kupën e Botës që do të zhvillohet në Kanada, Shtetet e Bashkuara dhe Meksikë.

Vendasit e nisin vrullshëm takimin dhe kalojnë në avantazh në minutën e 19-të: Ayari shërben për Elanga-n, i cili nuk fal dhe shënon për 1-0. Polonia reagon dhe në të 33-ën rikthen baraspeshën: Zielinski asiston për Zalewskin, që realizon për 1-1. Por para pushimit, Suedia rikthen epërsinë me Lagerbielke, duke shkuar në dhomat e zhveshjes në avantazh 2-1.

Në pjesën e dytë, Polonia nuk dorëzohet. Në minutën e 55-të, Zalewski shndërrohet në asistues për Swiderskin, i cili barazon në 2-2, me golin që konfirmohet nga VAR pas një momenti tensioni. Kur gjithçka dukej se po shkonte drejt kohës shtesë, në skenë del heroi: Gyökeres. Në minutën e 88-të, ai shënon golin vendimtar për 3-2, duke dërguar Suedinë në Botëror dhe duke lënë jashtë Poloninë. Zhgënjim i madh për Lewandowskin, që nuk arrin të lërë gjurmë në këtë sfidë vendimtare.

Ndërkohë, dramë e vërtetë në përballjen tjetër: Republika Çeke triumfon ndaj Danimarkës vetëm pas goditjeve të penalltive, pas barazimit 2-2 në kohën e rregullt dhe shtesë.

Çekët kalojnë të parët në avantazh me Sulc pas një goli mjaft të bukur, por në minutën e 72-të danezët barazojnë falë bashkëpunimit mes Damsgaard dhe Andersen. Në shtesën prej 30 minutash, të dyja skuadrat do të shënonin sërish, teksa fillimisht çekët me Krejci rikthejnë avantazhin për vendasit në minutën e 100-të, por Danimarka përgjigjet sërish me Hogh në të 111-ën, duke çuar gjithçka te penalltitë.

Nga pika e bardhë, danezët gabojnë rëndë: shënon vetëm Eriksen, ndërsa dështojnë Hojlund, Dreyer dhe Jensen. Penalltia vendimtare realizohet nga Sadilek, që vulos kualifikimin e Republikës Çeke për në Botëror.

Festë për çekët, zhgënjim për Danimarkën, që pas mbylljes së brezit të artë mbetet jashtë dhe do të tentojë rikthimin në vitin 2030.