Kanë përfunduar ndeshjet çerekfinale të Kupës së Shqipërisë për grupmoshat U-17 dhe U-19, duke përcaktuar ekipet që vijojnë rrugëtimin drejt trofeut në këtë edicion.

Në kategorinë U-17, në gjysmëfinale janë kualifikuar Teuta, Skënderbeu, Tirana dhe Partizani. Partizani regjistroi një fitore të thellë ndaj Dinamo City me rezultatin 3-0, ndërsa Tirana mposhti Apoloninë 2-1. Skënderbeu siguroi kualifikimin pas fitores 2-0 ndaj Vorës, ndërsa sfida mes Vllaznisë dhe Teutës u mbyll 1-1 në kohën e rregullt. Nga goditjet e penalltive, Teuta u tregua më e saktë, duke triumfuar 5-4.

Në fazën gjysmëfinale të U-17, Teuta do të përballet me Skënderbeun, ndërsa Tirana me Partizanin.

Edhe në kategorinë U-19 janë përcaktuar katër skuadrat gjysmëfinaliste të këtij edicioni.

Dinamo City, Partizani, Teuta dhe Laçi kanë siguruar një vend mes katër më të mirave.

Partizani fitoi bindshëm ndaj Skënderbeut me rezultatin 5-1, ndërsa Teuta triumfoi 2-0 përballë Apolonisë.

Ndeshja mes Vllaznisë dhe Dinamo City përfundoi pa gola në kohën e rregullt dhe u vendos nga penalltitë, ku Dinamo City fitoi 3-1.

Takimi mes Laçit dhe Bylisit nuk u zhvillua, pasi ekipi i Bylisit nuk u paraqit në ndeshje. Në bazë të rregullores, Laçi u kualifikua automatikisht në gjysmëfinale.

Rezultatet e çerekfinaleve:

U-17:
Tirana-Apolonia 2-1

Partizani-Dinamo City 3-0

Vllaznia-Teuta 1-1 P(4-5)

Vora-Skënderbeu 0-2

U-19:

Vllaznia-Dinamo 0-0 P(1-3)

Partizani-Skënderbeu 5-1

Apolonia-Teuta 0-2

Laçi-Bylis

 

Gjysmëfinalet

U17:
Teuta-Skënderbeu

Tirana-Partizani

U19:

Dinamo City – Partizani

Teuta – Laçi