TIRANE– Policia e Tiranës në bashkëpunim me Interpol Tirana kanë arrestuar ish-bashkëshorten e Fatmir Ramës, i njohur si Miri i Xhikes. Burime zyrtare bënë me dije se Manjola Prifti akuzohet për ‘pjesëmarrje në organizata kriminale, me qëllim trafikimin e lëndëve narkotike’. Të njëjtat burime sqarojnë se 43-vjeçarja ishte e shpallur në kërkim ndërkombëtar, pasi ishte dënuar nga gjykata italiane me 7 vite e 3 muaj burg.
Në vitin 2012 ajo u arrestua për probleme ligjore në Itali, por më pas u la e lirë. Ndërkohë Miri i Xhikes u ekzekutua në ambientet e kompleksit të tij “Kartodromi” në Lundër, 9 vjet më parë.
NJOFTIMI I POLICISE
Policia e Tiranës në bashkëpunim me Interpol Tirana kanë bërë arrestimin provizor me qëllim ekstradimi të shtetases:
Manjola Prifti, 43 vjeç, banuese në Tiranë.
Kjo shtetase ishte e shpallur në kërkim ndërkombëtar pasi:
Autoritetet Gjyqësore Italiane, e kanë dënuar shtetasen Manjola Prifti me 7 vjet, 3 muaj dhe 15 ditë burg, për veprën penale “Pjesëmarrje në organizatë kriminale, me qëllim trafikimin e lëndëve narkotike” bazuar në nenin 110 të Kodit Penal Italian dhe Neni 73 e 74 të Dekretit të Presidentit Italian nr. 309/90. Materialet u referuan në Prokurorinë pranë Gjykatës së Shkallës së Parë Tiranë.
(ed.me/BalkanWeb)
