Në deklaratën përfundimtare të Samitit të mbajtur në Hagë, vendet anëtare të NATO-s janë zotuar të rrisin ndjeshëm investimet në fushën e mbrojtjes dhe sigurisë.
Sipas dokumentit zyrtar, “aleatët zotohen të investojnë 5% të Prodhimit të Brendshëm Bruto vjetor në nevojat themelore të mbrojtjes dhe shpenzimet që lidhen me sigurinë deri në vitin 2035”.
Ky angazhim shënon një nivel të ri të përkushtimit përballë sfidave në rritje të sigurisë ndërkombëtare dhe vjen në përputhje me nenin 3 të Traktatit të Uashingtonit, që nxit vendet anëtare të forcojnë kapacitetet individuale dhe kolektive të mbrojtjes.
Për NATO-n, ky është një sinjal i qartë për përforcimin e qëndrueshmërisë ushtarake në dekadën e ardhshme.
Riafrimimi i nenit 5: NATO hyn në luftë nëse një shtet anëtar sulohet
“Ne, Krerët e Shteteve dhe Qeverive të Aleancës Atlantike, jemi mbledhur në Hagë për të riafirmuar angazhimin tonë ndaj NATO-s, Aleancës më të fortë në histori, dhe ndaj lidhjes transatlantike. Ne riafirmojmë angazhimin tonë të palëkundur ndaj mbrojtjes kolektive, siç përcaktohet në Nenin 5 të Traktatit të Uashingtonit: një sulm ndaj njërit është një sulm ndaj të gjithëve. Ne mbetemi të bashkuar dhe të vendosur në vendosmërinë tonë për të mbrojtur një miliard qytetarët tanë, për të mbrojtur Aleancën dhe për të mbrojtur lirinë dhe demokracinë tonë”.
Kjo është ajo që shkruhet në deklaratën përfundimtare të miratuar nga udhëheqësit në Samitin e NATO-s në Hagë.
Aleatët deklarojnë veten “të bashkuar përballë kërcënimeve dhe sfidave të thella të sigurisë, në veçanti kërcënimit afatgjatë që paraqet Rusia për sigurinë euroatlantike dhe kërcënimit të vazhdueshëm të terrorizmit”. Megjithatë, gjuha nuk përfshin një përkufizim të qartë të pushtimit rus të Ukrainës si një “luftë agresioni”.
“Aleatët riafirmojnë angazhimin e tyre sovran për të ofruar mbështetje për Ukrainën”, shkruhet më tej në deklaratën përfundimtare të Samitit të NATO-s në Hagë. Dokumenti, siç pritej gjerësisht, përjashton çdo përmendje të një hyrjeje të ardhshme të Ukrainës në Aleancë, në kundërshtim me atë që ndodhi në Uashington vitin e kaluar, ku u vendos parimi i “rrugës së pakthyeshme”. Gjithashtu nuk ka referenca për angazhimet financiare për Ukrainën – vitin e kaluar kishte 40 miliardë në vit – të cilat, në fakt, tani bëhen “një angazhim sovran”.
Ndërkohë, Presidenti i SHBA, Donald Trump, kur u pyet për Nenin 5 të Traktatit të Atlantikut të Veriut që parashikon angazhimin për mbrojtje të ndërsjellë në rast sulmi ndaj aleatëve të NATO-s, u përgjigj: “Ne jemi me ta gjatë gjithë kohës”.
(BalkanWebe)
