Shkëlqim Hajdari jep dorëheqjen si Kryeinspektor i Përgjithshëm.

Në një postim të publikuar sot në rrjetin social Facebook, Kryeinspektori njoftoi përmbylljen e reformës ligjore në fushën e inspektimeve. Sipas tij, rezultat i kësaj reforme është shfuqizimi i pesë masave të para administrative nga komisioni i shqyrtimit të ankesave, duke respektuar ligjin, objektivitetin dhe transparencën.

Procesi përfshiu përfaqësues nga Inspektorati i Përgjithshëm, Inspektorati Qendror që ka vendosur gjobën, ministria përkatëse, si dhe përfaqësues nga shoqatat e biznesit. Kryeinspektori Hajdari theksoi se reforma synon t’i japë fund paligjshmërisë, korrupsionit, subjektivizmit dhe barrës së padrejtë ndaj biznesit të ndershëm.

Hajdari shprehu falënderime për stafin e Inspektoratit të Përgjithshëm dhe institucionet e tjera të përfshira, duke e konsideruar reformën “të lodhshme, por vizionare” dhe në përputhje me standardet më të mira të inspektimeve në Bashkimin Europian.

Shkëlqim Hajdari mori detyrën e Kryeinspektorit në korrik të vitit 2016. Nuk dihen ende arsyet pse Hajdari dha dorëheqjen nga ky post.

Ish-prokurori Shkëlqim Hajdari ka një eksperiencë të gjatë prej më shumë se 20 vitesh në sistemin e drejtësisë. Ai dha dorëheqjen si Prokuror i Shkodrës ne vitin 2016.