Deputetët e Kuvendit mbajtën sot në nisje të seancës plenare një minutë heshtje në nder të gjyqtarit të Gjykatës së Apelit, Astrit Kalaja, i cili u vra tre ditë më parë në sallën e gjyqit.

Kryetari i Kuvendit , Niko Peleshi ftoi deputetët të ndalen një minutë për të nderuar kujtimin e gjyqtarit Astrit Kalaja, i cili humbi jetën tragjikisht të hënën në ambientet e Gjykatës së Apelit.

“Vrasja e një gjyqtari të Republikës së Shqipërisë u dënua nga gjithë spektri politik dhe mbarë opinioni publik në vendin tonë”, tha Peleshi.

“Gjyqtari Kalaja i shërbeu sistemit të drejtësisë me përkushtim, profesionalizëm dhe integritet duke lënë pas një shembull të ndershmërisë dhe përgjegjësisë në detyrë. Në shenjë respekti për jetën dhe kontributin e tij ju ftoj të mbajmë 1 minutë heshtje”, tha Peleshi.

Minuta e heshtjes erdhi pas kërkesës së kreut të grupit parlamentar të PS-së, Taulant Balla në Konferencën e Kryetarëve.