Lufta në Lindjen e Mesme ka shkaktuar mungesa të mëdha municionesh dhe probleme në zinxhirin e furnizimit për ushtrinë amerikane, ndërsa administrata e Donald Trump po përpiqet të rimbushë rezervat e armëve. Të dhënat dalin në raportin e parë të publikuar nga inspektori i përgjithshëm i Pentagonit, i porositur nga Kongresi dhe që mbulon periudhën nga fillimi i luftës me Iranin, më 28 shkurt, deri më 30 qershor. Raporti jep një prej vlerësimeve të para publike për koston dhe ndikimin e konfliktit në forcat e armatosura amerikane, Departamentin e Shtetit dhe agjenci të tjera. Sipas dokumentit, Pentagoni po punon për përmirësimin e proceseve të prokurimit dhe shkurtimin e kohës së prodhimit, si dhe për krijimin e rezervave të materialeve kritike, komponentëve dhe municioneve. Qëllimi është që ushtria amerikane të jetë në gjendje të reagojë më shpejt në rast emergjence.
Raporti bie ndesh me deklaratat e fundit të sekretarit të Mbrojtjes, Pete Hegseth, i cili ka mohuar se SHBA-ja po përballet me mungesa serioze municionesh. Edhe Trump ka kundërshtuar publikisht raportimet për mungesa. Në një postim në Truth Social të hënën, presidenti amerikan tha se SHBA-ja po prodhon armë më të avancuara dhe më të sofistikuara se në çdo periudhë tjetër të historisë së vendit dhe se ato po u dorëzohen çdo ditë forcave amerikane në Lindjen e Mesme dhe më gjerë. Dy javë më parë, Trump kishte deklaruar se Shtetet e Bashkuara dispononin sasi “pothuajse të pakufizuara” municionesh.
Një nga gjetjet më të rëndësishme të raportit është konfirmimi se Irani shënjestroi me dronë dhe raketa balistike qendrën kryesore logjistike të Marinës Amerikane në Lindjen e Mesme, në Bahrein.
Inspektori i përgjithshëm dokumenton gjithashtu dëme të konsiderueshme në pajisjet ushtarake, avionët dhe materiale të tjera gjatë katër muajve të parë të konfliktit. Sipas raportit, të paktën 30 dronë të mëdhenj amerikanë u shkatërruan.
Raporti nuk përmend një sulm të mundshëm amerikan ndaj një shkolle fillore në qytetin iranian Minab, në orët e para të konfliktit. Ushtria amerikane nuk ka publikuar ende një hetim të brendshëm për këtë bombardim.
Sipas raportit, kostoja e luftës me Iranin deri në periudhën e analizuar arrin në rreth 33.4 miliardë dollarë, pa përfshirë shpenzimet për riparimin e objekteve të dëmtuara.
Nga kjo shumë, rreth 22.3 miliardë dollarë lidhen me municionet e përdorura, 3.7 miliardë dollarë me humbjet e pajisjeve dhe 7.4 miliardë dollarë me kosto të tjera.
Ndërkohë, në korrik, NBC News raportoi se disa zyrtarë amerikanë dhe persona të njohur me vlerësimet e brendshme e kishin vendosur koston e luftës në intervalin 80 deri në 100 miliardë dollarë. Pentagoni kishte deklaruar publikisht në korrik se konflikti kishte kushtuar 37.5 miliardë dollarë, por kjo shifër nuk përfshinte zëvendësimin e avionëve, riparimin e bazave amerikane dhe rimbushjen e rezervave kritike të armëve.
Trump fillimisht kishte parashikuar se lufta do të zgjaste vetëm disa javë. Por gjatë fundjavës ai tha se konflikti mund të mos përfundojë deri “menjëherë pas” zgjedhjeve të mesit të mandatit në nëntor, ose edhe më herët.
Mbi 20 mijë ushtarakë dhe diplomatë u zhvendosën
Raporti zbulon se më shumë se 20 mijë personel ushtarak dhe diplomatik amerikan u zhvendosën si pasojë e konfliktit. Procesi nisi në fillim të luftës dhe vijoi gjatë ditëve dhe javëve pasuese.
Një pjesë e madhe e vlerësimeve mjekësore për ushtarakët amerikanë të plagosur u krye në vend, ndërsa disa prej tyre u transportuan në qendra mjekësore lokale. Kapacitetet e transportit ajror u devijuan për shkak të shqetësimeve të sigurisë.
Forcat amerikane kryen gjithashtu deri në 5 mijë fluturime nga bazat evropiane për të mbështetur operacionet në rajon.
U shkatërruan F-15, F-35, A-10 dhe dhjetëra dronë
Raporti dokumenton dëme të shumta në avionët luftarakë, pajisjet ushtarake dhe bazat amerikane në Lindjen e Mesme.
Në mesin e avionëve të dëmtuar ose të shkatërruar përmenden katër F-15E, një F-35A Joint Strike Fighter dhe një A-10 Warthog, i cili u shkatërrua. Po ashtu, u shkatërruan 12 avionë furnizimi me karburant KC-135, si dhe nëntë avionë të tjerë.
Deri në qershor, sipas raportit, ishin shkatërruar gjithashtu më shumë se 30 dronë MQ-9. Të dhënat janë bazuar në informacionet e Shërbimit të Kërkimeve të Kongresit.
Mbi 208 milionë dollarë dëme në objektet diplomatike
Edhe Departamenti i Shtetit pësoi dëme të konsiderueshme. Sipas raportit, dëmet në objektet e tij në Irak, Kuvajt, Arabinë Saudite dhe Emiratet e Bashkuara Arabe kaluan 208 milionë dollarë.
Rreth 184 milionë dollarë lidhen me dëmet në objektet diplomatike, ndërsa rreth 25 milionë dollarë të tjera me vonesat në projektet e ndërtimit.
Sipas raportimeve, dëmet e shkaktuara nga Irani në bazat ushtarake amerikane kanë qenë më të mëdha nga sa ishte bërë publike më parë. Po ashtu, sulmet iraniane kanë shkaktuar dëme të konsiderueshme në infrastrukturën amerikane të mbledhjes së inteligjencës dhe mbikëqyrjes në rajon, me koston e rikthimit të tyre në funksion që vlerësohet në miliarda dollarë.
Raporti i inspektorit të përgjithshëm nuk trajton moralin e trupave amerikane të angazhuara në operacione. Megjithatë, javët e fundit janë shtuar shqetësimet për kushtet e ushtarakëve të dislokuar prej muajsh në Lindjen e Mesme.
Në mesin e tyre janë edhe pjesëtarët e ekuipazhit të aeroplanmbajtëses USS Abraham Lincoln, e cila ka qëndruar për një periudhë të gjatë në rajon. Pentagoni ka njoftuar se aeroplanmbajtësja do të zëvendësohet, ndërsa “Lincoln” ndodhet në rrugën e kthimit drejt bazës së saj në San Diego, pas një ndalese në Tajlandë.
