Sekretari i Përgjithshëm i OKB-së, Antonio Guterres, deklaroi se ekziston mundësia e hapjes së kanaleve diplomatike për t’i dhënë fund luftës në Liban, e cila ka shpërthyer që nga fillimi i marsit mes Izraelit dhe lëvizjes shiite Hezbollah.

Gjatë një konference për shtyp në Bejrut, Guterres theksoi se konflikti nuk mund të zgjidhet me mjete ushtarake. “Nuk ka zgjidhje ushtarake, vetëm diplomaci dhe dialog”, u shpreh ai, duke bërë thirrje për një deeskalim të menjëhershëm dhe ndërprerje të armiqësive.

Sipas të dhënave zyrtare, sulmet ajrore dhe operacionet tokësore të Izraelit në Liban kanë shkaktuar të paktën 826 viktima, mes tyre 106 fëmijë, ndërsa mbi 830 mijë civilë janë zhvendosur nga shtëpitë e tyre që nga fillimi i muajit.

Guterres i bëri thirrje gjithashtu komunitetit ndërkombëtar të rrisë mbështetjen për shtetin libanez dhe Forcat e Armatosura të Libanit, në mënyrë që të kenë burimet dhe kapacitetet e nevojshme për të përballuar krizën.

Libani u përfshi drejtpërdrejt në konflikt më 2 mars, kur Hezbollahu lëshoi raketa dhe dronë drejt Izraelit si hakmarrje për vrasjen e udhëheqësit suprem iranian Ali Khamenei më 28 shkurt, në orët e para të luftës mes SHBA-së, Izraelit dhe Iranit.

Udhëheqësi i Hezbollahut, Naim Qassem, paralajmëroi se lëvizja është e përgatitur për një “konflikt të gjatë” me Izraelin, duke e cilësuar situatën si një “betejë ekzistenciale”. Ndërkohë, ushtria izraelite ka intensifikuar bombardimet dhe ka dërguar forca tokësore në disa zona të Libanit jugor.

Sipas mediave ndërkombëtare, Izraeli synon të marrë nën kontroll zonën në jug të lumit Litani me qëllim çmontimin e infrastrukturës ushtarake të Hezbollahut. Nga ana tjetër, lëvizja shiite ka raportuar për luftime të drejtpërdrejta me trupat izraelite në disa zona.