Aeroporti ndërkombëtar Malpensa i Milanos tashmë mban zyrtarisht emrin e ish-kryeministrit italian dhe manjatit të medias, Silvio Berlusconi. Vendimi për riemërtimin, i marrë fillimisht nga autoriteti italian i aviacionit civil ENAC, u zbatua zyrtarisht pas një procesi të shoqëruar me debate dhe sfida ligjore. Aeroporti do të quhet “Milano Malpensa – Silvio Berlusconi”, duke e lidhur emrin e ish-kryeministrit me një prej porteve kryesore ajrore të Italisë, që çdo ditë pret mijëra udhëtarë nga vende të ndryshme të botës.
Marina Berlusconi, vajza e madhe e ish-kryeministrit dhe presidente e grupit familjar Fininvest, e ka cilësuar këtë moment si emocionues. Në një deklaratë për ANSA-n, ajo tha se fakti që emri i babait të saj do të mirëpresë udhëtarët që mbërrijnë në Milano dhe do t’u japë lamtumirën atyre që nisen drejt destinacioneve të tjera e mbush me krenari. “Çfarë emri më të mirë mund të ketë për një urë si kjo sesa ai i Silvio Berlusconit? Ai ishte një njeri që gjithmonë kërkonte dialog me të gjithë. Babai im e kaloi jetën duke parë përpara dhe larg”, u shpreh Marina Berlusconi.
Vendimi për riemërtimin u mor nga ENAC në vitin 2024, një vit pas vdekjes së Berlusconit në moshën 86-vjeçare, me mbështetjen e qeverisë së qendrës së djathtë, ku bën pjesë edhe Forza Italia, partia e themeluar prej tij.
Riemërtimi u shoqërua me polemika në Itali. Administrata e qendrës së majtë të Milanos, e drejtuar nga kryebashkiaku Beppe Sala, kundërshtoi vendimin dhe sfidat ligjore vonuan zbatimin e tij. Me emrin e ri, Malpensa bëhet një tjetër simbol publik i lidhur me figurën e Berlusconit, i cili ishte kryeministër i Italisë në tre mandate dhe një prej figurave më të njohura të politikës dhe medias italiane.
