Muaji mars i vitit 2026 është renditur ndër më të ngrohtët e regjistruar ndonjëherë, duke ngritur shqetësime të reja për përshpejtimin e ndryshimeve klimatike. Sipas Copernicus Climate Change Service, ky ishte marsi i katërt më i ngrohtë në nivel global dhe i dyti më i ngrohtë i regjistruar ndonjëherë në Evropë.

Të dhënat tregojnë gjithashtu se temperaturat globale të sipërfaqes së detit arritën nivelin e dytë më të lartë historik për muajin mars, menjëherë pas vitit 2025, duke reflektuar edhe një rikthim të mundshëm të fenomenit El Niño.

Drejtori i shërbimit klimatik në European Centre for Medium-Range Weather Forecasts, Carlo Buontempo, i cilësoi të dhënat si “zhgënjyese”, duke paralajmëruar për një sistem klimatik nën stres të vazhdueshëm.

Sipas raportit, marsi 2026 ishte rreth 1.48°C mbi nivelet para-industriale (1850–1900), ndërsa akulli detar në Arktik arriti shtrirjen më të ulët të regjistruar ndonjëherë për këtë periudhë.

Pothuajse e gjithë Evropa përjetoi temperatura mbi mesataren, me kushtet më të nxehta të regjistruara në veriperëndim të Rusisë, në veri të Skandinavisë dhe në vendet baltike.

Ndërkohë, kontraste të forta u vunë re në rajone të tjera: pjesë të SHBA-së dhe Meksikës përjetuan valë të hershme të nxehti, ndërsa Alaska, Kanadaja, Groenlanda jugore dhe Siberia veriperëndimore u përballën me temperatura jashtëzakonisht të ulëta.