Një tjetër ndërprerje energjie ka goditur Rivierën Franceze, vetëm një ditë pas një incidenti të ngjashëm në Cannes, duke ngritur shqetësime për veprime të qëllimshme.

Gjatë natës në qytetin e Nicës ka shpërthyer një zjarr në një nënstacion elektrik, duke lënë pa energji rreth 45,000 banesa në qytet dhe zonat përreth. Ngjarja ndodhi rreth orës 02:00 të mëngjesit të së dielës dhe, sipas autoriteteve, dyshohet se ishte rezultat i një akti të qëllimshëm.

Ndërprerja ndikoi në funksionimin e aeroportit të Nicës, linjën e tramvajit si dhe në qytetet e afërta Saint-Laurent-du-Var dhe Cagnes-sur-Mer. Furnizimi me energji u rikthye disa orë më vonë gjatë mëngjesit.

Kryetari i Bashkisë së Nicës, Christian Estrosi, reagoi në rrjetin X duke dënuar ashpër incidentin dhe e cilësoi atë si një akt keqdashës që dëmton vendin.

Ky është rasti i dytë brenda 48 orësh. Një ditë më parë, një tjetër ndërprerje e madhe energjie kishte prekur Cannes dhe zonat përreth, ku rreth 160,000 banesa mbetën pa rrymë. Autoritetet atje po hetojnë mundësinë e një sabotimi, pasi besohet se një zjarr i qëllimshëm në një tjetër nënstacion ka shkaktuar ndërprerjen.

Festivali i Filmit në Cannes, që po zhvillohet në të njëjtën kohë, është ndikuar nga këto ndërprerje, me disa aktivitete që janë pezulluar përkohësisht në orët e para të mëngjesit.