Kancelari Friedrich Merz paralajmëroi për rrezikun e përshkallëzimit të luftës në Iran  dhe përsëriti se Gjermania do të kontribuojë në sigurinë e Ngushticës së Hormuzit  vetëm pas përfundimit të konfliktit.

“Përshkallëzimi i luftës në një konflikt të madh rajonal do të ushtronte presion mbi Gjermaninë dhe Evropën, të krahasueshëm me atë të luftës në Ukrainë ose pandemisë së koronavirusit”, tha zoti Merz gjatë konferencës për shtyp që dha pas takimit të tij me Presidentin sirian Ahmed al-Sharaa, duke iu referuar kryesisht rritjes së shpejtë të çmimeve të karburantit, por edhe nevojës për mbrojtje shtesë për sinagogat dhe komunitetet hebraike.

Gjermania do të kontribuojë në sigurinë e Ngushticës së Hormuzit vetëm pas përfundimit të luftës në Iran, theksoi përsëri Kancelari dhe shtoi se zgjidhja më e mirë është përfundimi i konfliktit të armatosur sa më shpejt të jetë e mundur. “Për sa kohë që plotësohen kushtet e nevojshme, Gjermania sigurisht që do të jetë e gatshme të kontribuojë në sigurimin e lirisë së lundrimit në rajon”, theksoi ai, dhe sugjeroi që projekti të ndërmerret nga një grup kontakti ndërkombëtar që do të koordinonte vendet e gatshme të ndihmonin. I pyetur gjithashtu për këtë, ai përjashtoi edhe një herë mundësinë e pjesëmarrjes së forcave të armatosura gjermane në një operacion ushtarak.