Ministri i Naftës i Iranit, Mohsen Paknejjad, ka dhënë dorëheqjen nga detyra, ndërsa Hamid Bovard, drejtori ekzekutiv i Kompanisë Kombëtare Iraniane të Naftës (NIOC), është emëruar ministër i përkohshëm i Naftës.

Lajmi është bërë i ditur nga mediat shtetërore iraniane, të cilat nuk kanë dhënë një arsye për dorëheqjen e Paknejjad.

Paknejjad kishte mbajtur postin e ministrit të Naftës që prej gushtit 2024. Dorëheqja e tij vjen në një periudhë presioni të shtuar mbi ekonominë iraniane, në sfondin e përplasjeve mes Iranit dhe Shteteve të Bashkuara.

Sipas mediave shtetërore, presidenti iranian Masoud Pezeshkian ka pranuar dorëheqjen dhe ka emëruar Bovard në detyrën e përkohshme.

Pak para njoftimit për dorëheqjen, Paknejjad ishte shprehur se të ardhurat nga nafta e shitur nga Irani vazhdonin të hynin në vend dhe se, sipas tij, kjo pritej të vijonte.