Meta pritet të përballet me një nga sfidat më të mëdha ligjore në historinë e saj, teksa një gjyq me juri nis të martën në SHBA për mënyrën se si platformat Instagram dhe Facebook ndikojnë te fëmijët dhe adoleshentët.

Çështja rrjedh nga një padi e ngritur në vitin 2023 nga 30 shtete amerikane, mes tyre Kalifornia dhe Nju Jorku. Shtetet akuzojnë kompaninë për shkelje të ligjeve federale dhe shtetërore lidhur me privatësinë dhe mbrojtjen e të miturve.

Përveç ndryshimeve të thella në funksionimin e platformave, paditësit kërkojnë nga Meta më shumë se 1 trilion dollarë dëmshpërblime dhe masa të tjera ligjore.

Kërkohen ndryshime rrënjësore në Instagram dhe Facebook

Shtetet kërkojnë që Meta të ndryshojë një sërë funksionesh që, sipas tyre, janë krijuar për të tërhequr përdoruesit e rinj dhe për t’i mbajtur ata sa më gjatë në platforma.

Sipas shteteve, këto mekanizma janë pjesë e një modeli të krijuar për të rritur angazhimin dhe për t’i rikthyer vazhdimisht fëmijët dhe adoleshentët në aplikacione.

Padia pretendon se Meta ka përdorur veçori dhe njoftime të shpeshta për të rritur kohën që të rinjtë kalojnë në platformat e saj, duke e vendosur zgjerimin e bazës së përdoruesve përpara interesave të tyre.

Meta mohon akuzat

Kompania i ka kundërshtuar vazhdimisht këto pretendime dhe thotë se provat do të tregojnë përpjekjet e saj për të mbrojtur përdoruesit e rinj.

“Ne nuk pajtohemi fuqimisht me këto akuza dhe jemi të bindur se provat do të tregojnë angazhimin tonë të gjatë për të mbështetur të rinjtë”, deklaroi një zëdhënëse e Meta-s.

Çështja do të shqyrtohet nga gjyqtarja federale Yvonne Gonzalez Rogers, e cila është përfshirë edhe në çështje të tjera të profilit të lartë në industrinë e teknologjisë.

Një vendim i fundit rrit presionin ndaj Metës

Gjyqi federal vjen në një moment kur Meta tashmë po përballet me pasoja të tjera ligjore lidhur me sigurinë e të miturve.

Në Nju Meksiko, gjyqtari Bryan Biedscheid vendosi një gjobë prej 942 milionë dollarësh ndaj kompanisë dhe urdhëroi ndryshime në mënyrën se si Instagram dhe Facebook funksionojnë për përdoruesit nën 18 vjeç.

Masat përfshijnë kufizimin e shfaqjes së numrit të pëlqimeve, ndalimin e shkëmbimit të përmbajtjeve të caktuara intime mes adoleshentëve dhe kufizimin e njoftimeve push në periudha të caktuara të ditës.

Gjykatësi e cilësoi Metën si një “shqetësim publik”, duke e krahasuar ndikimin e saj me një burim ndotjeje që mund të shkaktojë pasoja te një popullsi e gjerë. Meta ka deklaruar se do ta apelojë vendimin.

Mund të ndryshojë mënyrën se si përdoren rrjetet sociale

Nëse 30 shtetet amerikane fitojnë çështjen, pasojat mund të jenë shumë më të mëdha se ato të vendimit në Nju Meksiko. Shtetet që janë pjesë e padisë përfaqësojnë rreth dy të tretat e popullsisë së SHBA-së.

Një vendim kundër Metës mund ta detyrojë kompaninë të ndryshojë në shkallë kombëtare mënyrën se si funksionojnë Instagram dhe Facebook për përdoruesit e rinj.

Kjo do të përbënte një ndryshim të rëndësishëm në modelin aktual të rrjeteve sociale dhe mund të ndikonte drejtpërdrejt te disa prej funksioneve më të përdorura nga miliona përdorues çdo ditë.