Mllef dhe emocion. Leoardo Bonucci, në një intervistë për Sportmediset, thyen heshtjen dhe tregon të vërtetën e tij në lidhje me largimin e bujshëm nga Juventus. Ndryshe nga se është folur në media, Bonucci ka një tjetër version teksa sulmon drejtuesit e “Zonjës së Vjetër” dhe trajnerin Allegri:
“Kam lexuar e dëgjuar gjëra të pavërteta nga Juve dhe trajneri. Nuk është e vërtetë që në tetor apo shkurt më kanë komunikuar që nuk bëj pjesë në planet e klubit dhe se dëshironin që në fund të sezonit të ndërprisnim bashkëpunimin. Përkundrazi, në fund të muajit maj i shpreha vullnetin tim se mund të pranoja faktin që të isha zgjedhja e katërt apo e pestë në mbrojtje.
Nuhata diçka që nuk shkonte, më pas më 13 korrik, Giuntoli dhe Manna erdhën në shtëpinë time dhe më komunikuan se nuk do të isha pjesë e grupit dhe se prezenca ime do të pengonte rritjen e ekipit. Ky ishte një turpërim për mua pas 500 ndeshjeve që kam zhvilluar me fanellën bardhezi. Më bëhet qejfi vetëm për mbështetjen e madhe që mora, edhe nga lojtarët aktual të Juventuesit”, u shpreh ndër të tjera Bonucci.
(BalkanWeb)
