Analisti Ben Andoni, i ftuar në studion e News24, ka komentuar zhvillimet e fundit politike në vend, duke u ndalur veçanërisht te situata brenda Partisë Demokratike dhe roli i opozitës në raport me mazhorancën.

Sipas Andonit, kryetari i PD-së, Sali Berisha, po përballet me një sfidë të vështirë, ndërsa imazhi i partisë, sipas tij, është ai i një force politike që prodhon situata të tensionuara. Ai theksoi se shqetësimi i atyre që e ndjekin PD-në lidhet me mesazhet që ajo përcjell dhe me logjikën që ndërton për të ardhur në pushtet.

“Ka ardhur koha që e djathta të vijë në pushtet në Shqipëri. Ka shumë intelektualë të së djathtës dhe pjesë të elektoratit gri që duan të shohin jo vetëm një qeveri në hije të PD-së, por edhe një alternativë të qartë”, u shpreh Andoni.

Ai shtoi se Berisha ka zgjedhur një strategji që, sipas tij, synon të mbajë të mobilizuar një pjesë të strukturave të partisë, duke treguar se është ende i aftë të mbledhë njerëz rreth vetes. Megjithatë, analisti vlerësoi se PD prej kohësh ka humbur bazën e saj tradicionale.

“Shumë nga ata që dalin dhe protestojnë janë si heronj, ndërsa drejtuesit e partisë ulen me mazhorancën për reforma, për rritje pagash apo për çështje të tjera. Kjo krijon një kontrast me mesazhin që jepet publikisht”, tha ai.

Duke folur për qeverisjen, Andoni theksoi se mënyra se si kryeministri Edi Rama drejton vendin është e njohur edhe për faktorët ndërkombëtarë, pavarësisht propagandës së brendshme.