Donald Trump është ende duke punuar për një takim negociues midis Vladimir Putin dhe Volodymyr Zelensky.

Shtëpia e Bardhë e njoftoi këtë pasi presidenti Francez Emmanuel Macron paralajmëroi se presidenti amerikan rrezikonte të “bëhej budalla” nga Putin nëse ky i fundit nuk pranonte takimin së shpejti.

“Shtetet e Bashkuara vazhdojnë të punojnë me zyrtarët rusë dhe ukrainas drejt një takimi dypalësh për t’i dhënë fund vrasjeve dhe luftës”, tha një zyrtar i Shtëpisë së Bardhë në kushte anonimiteti.

Sulmet e fundit me dronë dhe raketa kundër Ukrainës “vënë në pikëpyetje seriozitetin e dëshirës së Rusisë për paqe. Këto sulme ndaj zonave civile duhet të ndalen menjëherë”, tha John Kelley, zëvendësambasador i SHBA-së në OKB, gjatë takimit të Këshillit të Sigurimit mbi Ukrainën.

“Rusia duhet të vendosë tani të ecë drejt paqes; udhëheqësit e Moskës dhe Kievit duhet të bien dakord të takohen në mënyrë bilaterale”, shtoi ai, duke ngritur kërcënimin e sanksioneve.