Izraeli dhe Libani pritet të zhvillojnë një raund të dytë bisedimesh në Washington këtë të enjte, në përpjekje për të zgjatur armëpushimin aktual 10-ditor mes dy vendeve.

Diskutimet mes palëve vijnë në një moment delikat, ndërsa raundi i parë i negociatave çoi në arritjen e një armëpushimi të përkohshëm, i cili hyri në fuqi më 16 prill.

Presidenti i Libanit, Joseph Aoun, deklaroi se bisedimet në nivel ambasadorësh synojnë disa objektiva kyç, përfshirë ndalimin e plotë të agresioneve izraelite, tërheqjen e forcave izraelite nga territoret libaneze, kthimin e të burgosurve dhe vendosjen e ushtrisë libaneze përgjatë kufijve ndërkombëtarë.

Ai gjithashtu theksoi rëndësinë e nisjes së procesit të rindërtimit në zonat e prekura nga konflikti, duke e konsideruar këtë një hap të domosdoshëm për stabilitet afatgjatë.