‘Netflix’ ka publikuar trailerin zyrtar për sezonin e pestë të serialit të suksesshëm “Emily in Paris”, dhe këtë herë historia merr një kthesë të re mesdhetare. Pas katër sezoneve plot romancë, ndërlikime profesionale dhe aventura pariziane, Emily Cooper, e interpretuar nga Lily Collins, zhvendoset në Itali për sfidën e radhës në karrierë.

Sipas pamjeve të para të publikuara nga platforma, Emily merr përsipër menaxhimin e zyrës së re të Agence Grateau në Romë. Qyteti i përjetshëm sjell jo vetëm arkitekturën spektakolare dhe atmosferën e gjallë të rrugëve italiane, por edhe ritme të reja pune, sfida të panjohura dhe, si gjithmonë, shumë dramë. Në trailer shfaqen skena të mbushura me energji, humor dhe elegancën karakteristike të Emily-t, ndërsa ajo përpiqet të balancojë jetën profesionale me romancat e komplikuara që e ndjekin kudo. Me ngjyrat e ngrohta të Romës dhe sharmit që sjell ekipi i serialit, sezoni i ri premton të jetë po aq i ndritshëm dhe dinamik sa episodet e mëparshme, por me një shije të re, tërësisht italiane.

Fansat pritet të zbulojnë personazhe të reja, intriga dhe një fazë tjetër në zhvillimin personal dhe profesional të Emily-t. Ndërkohë, shumë nga fytyrat e njohura të serialit kthehen për të vazhduar historitë e tyre, duke krijuar kombinimin perfekt mes të vjetrës dhe të resë. ‘Netflix’ ende nuk ka zbuluar detaje të plota rreth datës së publikimit, por pritshmëritë janë të larta dhe reagimet e para pozitive nuk kanë munguar. Sezoni i pestë i “Emily in Paris” duket gati të sjellë një aventurë të re vezulluese në zemër të Italisë dhe fansat mezi po presin ta shohin.