Janë zyrtarizuar tarifat e reja për përdorimin e Tunelit të Llogorasë, duke përmbyllur procesin për vendosjen e pagesës për këtë aks rrugor.
Vendimi është bërë efektiv përmes një Udhëzimi të Përbashkët, i cili është botuar në Fletoren Zyrtare, duke hyrë automatikisht në fuqi.
Pagesat janë të diferencuara sipas madhësisë dhe tipit të automjetit dhe ndahen në pesë kategori:
- 100 Lekë – Motoçikleta dhe mjete me dy rrota.
- 250 Lekë – Automjete të vogla dhe mjete shpërndarjeje me dy boshte (lartësi deri në 1.30 m).
- 500 Lekë – Makinat me rimorkio ose karavanë (më shumë se dy boshte, lartësi deri në 1.30 m).
- 1,000 Lekë – Furgonë, minibusë dhe automjete të mesme (lartësi mbi 1.30 m).
- 5,000 Lekë – Automjete të rënda, si autobusë e kamionë me shumë boshte dhe rimorkio (lartësi mbi 1.30 m).
Të gjitha tarifat përfshijnë TVSH-në.
Për përdoruesit e rregullt do të ketë mundësi abonimi me parapagim, ndërsa çmimet për këtë kategori do të përcaktohen brenda 6 muajve nga hyrja në fuqi e udhëzimit.
Sipas udhëzimit, disa kategori automjetesh dhe përdoruesish përjashtohen plotësisht nga tarifat, për shkak të funksioneve të tyre:
- Policia Rrugore, autoambulancat dhe forcat zjarrfikëse.
- Mjetet ushtarake dhe ato të NATO-s.
- Automjetet e punonjësve të ARRSH-së dhe të Entit Kombëtar të Operimit Rrugor, gjatë kryerjes së detyrës.
- Personat me status invalidi, kur automjetet i përdorin për qëllime personale.
Për arsye sigurie, ndalohet qarkullimi në tunel i mjeteve që transportojnë mallra të rrezikshme.
