Për herë të parë në një emision televiziv, mjeku Skerdi Faria ka rrëfyer historinë e jetës së tij. Nga vitet e vështira të studimeve në Tiranë tek emigrimi në Itali ku teksa ndiqte specializimet punonte edhe si kamarier e së fundi te themelimi i KEIT në vitin 2011.
Duket sa e çuditshme aq dhe e vërtetë historia e tij dhe raporti me punën private, ku vetëm pak metra larg zyrave ku sot ndodhet KEIT ai nisi të shiste në rrugë vaj makinash.
Sapo kishte ardhur nga qyteti i Ballshit, ku me medalje ari kishte përfunduar shkollën e mesme, e tashmë në Tiranë do të ndiqte studimet e larta në mjekësi.
Ishin fillimet e viteve ’90 kur të dy prindërit mësues ishin hequr nga puna dhe familja nuk kishte asnjë burim të ardhurash.
“Biznesi i parë në thonjza ishte shitja e verës në Pazarin e Ri. Pastaj tek bordurat e Gjykatës së Lartë kam shitur lule plastike. Edhe ky biznes vajti keq. Më pas me vajin e makinës, por kur u hap kupola e Tiranës na falimentoi. Unë me ato para që kisha fituar mora me qira një dyqan të vogël fruta-perimesh të kohës së komunizmit, bëra ca punime brenda dhe krijova një bar- restorant të vogël. Çohesha në 5 të mëngjesit që të hapnim restorantin, gatuaja paçe, pilaf, tasqebap, në 8 shkoja në fakultet dhe vija era mish e era qepë. Pas leksioneve, me një biçikeletë (e më vonë mora një motor të vogël), bëja furnizimet tek Pazari i Ri dhe pasdite punoja aty në lokal. Në darkë studioja dhe të nesërmen e njëjta gjë”, tregoi mjeku gjatë intervistës për emisionin “Opinion”.
Pasi përfundoi Fakultetin e Mjekësisë në vitin 1995 me mesataren 9.5 Skerdi Faria nisi punën në Institutin e Shëndetit Publik.
“Kur mbarova Fakultetin e Mjekësisë fillova punë në Institutin e Shëndetit Publik. Nuk harroj premisën time të punës. Profesor Edi Kakarriqi më ka thënë këto fjalë: Këtu bëhesh shkencëtar, por mbetesh i varfër. Kisha qejf të bëhesha shkencëtar, por nuk dëshiroja të mbetesha i varfër”, tregoi Faria.
Pikërisht në këto kushte në vitin 1997, ndërsa punonte në ISHP ku ishte duke u marrë edhe me disa studime shkencore, vjen një ftesë për një konferencë në Itali. Ai largohet drejt Romës me një vizë dhe vendos të qëndrojë atje.
Fillimisht nisi punë në “Istituto Superiore di Sanità” dhe 1 vit më pas nisi specializimin në “Higjienë e Mjekësi Preventive”.
Me tej, kreu njohjen e diplomës në “La Sapienza” dhe mori laurea në Mjekësi e Kirurgji.
Mbrojti doktoratën në universitetin e Romës “La Sapienza” me temën e një studimi shkencor mbi infeksionet spitalore, si bashkëpunim i “Istituto Superiore di Sanità” dhe QSUT.
Ne vitin 2009 përfundoi specializimin për Anestezi e Reanimacion në Universitetin e Romës, “Tor Vergata”.
Te dy specializimet dhe doktoratën i ka përmbyllur me lode, vleresimi maksimal në Itali.
Në vitin 2011, vendosi të rikthehet në Shqipëri ku themeloi klinikën estetike KEIT.
“Në 15 Janar të 2011 filluam vizitat e para për kirurgjinë estetike”, tregoi mjeku Faria, duke shtuar se nuk e kishte menduar që do të arrinte deri këtu.
“Për mua më mirë të punosh kot se sa të rrish kot. Kam bërë kamarierin, kam bërë instruktorin e palestrës. Në Itali isha mjek, bëja specializimin dhe punoja kamarier në fundjavë. Në moshën 40 -vjeçare nuk isha i ri, shpika KEIT. Nuk e kam bërë vetë, e kam bërë bashkë me ata 170 djem e vajza që punojnë me mua Nuk ma merrte mendja që do të rritej kaq shumë. Tani jam super i bindur që do të rritet shumë më tepër”, tregoi Dr. Skerdi.
Sot KEIT është i vetmi spital ditor mbi kirurgjinë estetike i liçencuar në Shqipëri.