Senatori brazilian Flavio Bolsonaro e ka shpallur veten president të zgjedhur të Brazilit, nga SHBA, duke pretenduar se zgjedhjet presidenciale janë manipuluar nga presidenti i majtë Luiz Inácio Lula da Silva dhe Gjykata Supreme e vendit.

Në një letër të hapur, të shpërndarë nga aleatët e tij për gazetarët, Bolsonaro pretendoi se ishte privuar nga fitorja përmes asaj që e cilësoi si një grusht shteti zgjedhor.

“Dua t’u them jo vetëm 60 milionë votuesve të mi, por edhe popullit brazilian, se unë jam presidenti i zgjedhur dhe se kriminelët që vodhën zgjedhjet e Brazilit janë pjesë e një organizate kriminale që ka vendosur një tirani”, deklaroi ai.

Bolsonaro falënderoi presidentin amerikan Donald Trump dhe presidentin e Argjentinës, Javier Milei, për ndihmën që, sipas tij, i dhanë për t’u larguar nga Brazili dhe për mikpritjen në Shtetet e Bashkuara.

Senatori dhe familjarët e tij mbërritën në Miami të hënën, pasi ai u largua nga Brazili. Sipas raportimit, largimi i tij ndodhi pasi kishte refuzuar të zbatonte një urdhër të Gjykatës Supreme për dorëzimin e pasaportave, në kuadër të një hetimi për pastrim parash. Bolsonaro mohon çdo shkelje.

Megjithatë, ai nuk ka paraqitur prova për pretendimet e tij për manipulim të zgjedhjeve, ndërsa vëzhguesit ndërkombëtarë i kanë konsideruar zgjedhjet e së dielës të drejta.

Deklaratat e senatorit vijnë në një klimë të tensionuar politike në Brazil, ndërsa pretendimet për vjedhjen e votave dhe përfshirjen e institucioneve në procesin zgjedhor mbeten pa prova të paraqitura prej tij.