Rajoni i Ballkanit Perëndimor po përballet me një thatësirë të madhe, ndërsa një valë e të nxehtit po e mbyt njëkohësisht pjesën më të madhe të Evropës, e nxitur nga një anticiklon afrikan që po shkakton probleme për bujqësinë, prodhimin dhe shpërndarjen e energjisë elektrike dhe jetën e përditshme.
Një lumë devijohet në Shqipëri për të siguruar ujitjen e fushave bujqësore
Temperaturat në Shqipërinë qendrore arritën në 40 gradë Celsius të enjten dhe parashikuesit paralajmëruan se reshjet mund të jenë të pakta deri në shtator, me lumenjtë e vendit që tashmë janë pothuajse të tharë për shkak të reshjeve të pakta të dimrit dhe pranverës.
Temperaturat në rritje i kanë shtyrë autoritetet e Tiranës të marrin masa për ta bërë më të lehtë ujitjen e fushave. Në veçanti, ka përfunduar një projekt për devijimin e rrjedhës së lumit Mat , me qëllim ujitjen e rreth 40 kilometrave katrorë tokë bujqësore në zonë.
Por probleme janë regjistruar edhe në prodhimin e energjisë elektrike në Shqipëri, pasi ai është i lidhur me hidrocentralet e pranishme në veri të vendit. Kompania kombëtare e energjisë elektrike ka shpenzuar tashmë 60 milionë euro për të importuar energji në gjysmën e parë të këtij viti.
Kufizime të ujit në Serbi dhe Kosovë
Instituti kombëtar meteorologjik i Serbisë ka paralajmëruar se “thatësira ekstreme” po ndikon në të korrat e vendit, ndërsa nivelet e lumenjve dhe liqeneve kanë rënë. Qytetet dhe fshatrat e vogla në të gjithë vendin përballen gjithashtu me kufizime në ujin e pijshëm.
Në Kosovë, mungesa e ujit ka detyruar mbylljen e një pishine të hapur në kryeqytetin e Prishtinës, të cilën banorët e përdorin për t’u freskuar në vapën e verës. Pishina Gërmia, e vendosur në periferi të qytetit dhe pjesë e një parku rajonal, u ndërtua në fund të viteve 1980 dhe konsiderohet si një nga më të mëdhatë në kontinent. Në këtë kohë vitin e kaluar, normalisht kishte midis 4,000 dhe 5,000 vizitorë në ditë.
Parku Gërmia, i njohur për bukurinë e tij natyrore, ndodhet midis kodrave dhe maleve që i ofrojnë pishinës burime natyrore ujore. Por këtë vit stafi i pishinës nuk mundi të siguronte 20 mijë metra kub ujë të nevojshëm për funksionimin e saj të duhur. Vitet e kaluara duheshin gjashtë ditë për të mbushur pishinën, por këtë vit do të duhen më shumë se tre javë për shkak të thatësirës, tha drejtori Bardh Krasniqi.
“Për shkak të valës së fortë të të nxehtit që po prek vendin dhe të gjithë Ballkanin, për fat të keq nuk ishim në gjendje ta hapnim objektin”, shtoi menaxheri.
Gjatë valës së të nxehtit të javës së kaluar në Evropë, temperaturat përvëluese arritën në 46.6 gradë Celsius në rajonin portugez të Morës. Zjarret janë gjithashtu më të shpeshta në rajon gjatë verave më të nxehta dhe më të thata.
Klimatologët dhe meteorologët kanë shpjeguar vazhdimisht se ndryshimet e vazhdueshme klimatike, të shkaktuara nga shfrytëzimi i lëndëve djegëse fosile, do t’i bëjnë ngjarjet ekstreme gjithnjë e më të shpeshta dhe të nxehta.
(BalkanWeb)
