Raportime të reja nga rrjeti televiziv saudit Al-Hadath, duke cituar një burim sigurie izraelite, kanë ngritur pikëpyetje mbi situatën e brendshme në Iran, duke pretenduar se udhëheqësi suprem i ri i Republikës Islamike, Mojtaba Khamenei, nuk ndodhet më në territorin iranian.

Sipas raportimit, Mojtaba Khamenei, i cili mori drejtimin e vendit pas vdekjes së babait të tij, Ali Khamenei, nuk është shfaqur publikisht që nga marrja e detyrës dhe deri tani ka komunikuar vetëm përmes deklaratave me shkrim.

Një prej këtyre mesazheve u transmetua së fundmi nga televizioni shtetëror iranian. Në deklaratë thuhej se, nëse Shtetet e Bashkuara kërkojnë të rifillojnë luftën, “kombi iranian dhe fronti i rezistencës kanë mësime të paharrueshme për t’u dhënë”. Gjithashtu, aty akuzohej Uashingtoni për shkelje të përsëritura të memorandumit të mirëkuptimit të Islamabadit, duke u theksuar se “firma e presidentit amerikan nuk ka vlerë”.

Burimi izraelit, i cituar nga Al-Hadath, pretendon gjithashtu se këto deklarata nuk janë hartuar nga vetë Mojtaba Khamenei, por nga kreu i ri i Korpusit të Gardës Revolucionare Islamike (IRGC), Ahmad Vahidi, së bashku me zyrtarë të tjerë të lartë të këtij institucioni.

Sipas të njëjtit burim, tensionet dhe përplasjet e brendshme në Iran kanë arritur nivele të larta, duke rrezikuar edhe vetë strukturën e Gardës Revolucionare.

Në të njëjtën kohë, burimi pretendon se Shtetet e Bashkuara nuk dëshirojnë që Izraeli të përfshihet në një operacion të ri ushtarak amerikan kundër Iranit, edhe në rast se Teherani ndërmerr një sulm ndaj Izraelit.

Megjithatë, këto pretendime nuk janë konfirmuar nga burime të pavarura. Deri më tani nuk ka pasur asnjë reagim apo deklaratë zyrtare nga autoritetet në Teheran, Uashington apo Izrael, ndaj informacioni mbetet i pakonfirmuar.