Një person vdiq dhe 13 të tjerë u plagosën, përfshirë tetë fëmijë, pasi u goditën nga rrufeja në New Jersey të SHBA-së, thanë zyrtarët.

Goditja ndodhi pranë një grupi në poligonin e harkut Black Knight Bowbenders, një vend i njohur për komunitetin që organizon rregullisht evente, tha kryebashkiaku i Jackson Township, Michael Reina, për stacionin e ABC News në Nju Jork, WABC.

Departamenti i Policisë së Jackson Township tha se mori një telefonatë pak pas orës 7 të mbrëmjes që raportonte se disa persona u goditën nga rrufeja.

Një 61-vjeçar, i cili u identifikua nga kryetari i bashkisë si instruktor, vdiq nga plagët e marra. Zyrtarët po vazhdojnë të mbledhin informacione përpara se të publikojnë identitetin e tij, sipas kryetarit të bashkisë.

Lëndimet varionin nga “djegie deri te ankesa jo specifike për të mos u ndjerë mirë”, tha departamenti i policisë në një deklaratë për WABC.

Të gjithë u transportuan në spitalet aty pranë, përfshirë Qendrën Mjekësore të Universitetit Jersey Shore. Një person me lëndime më serioze u dërgua në Qendrën e Djegieve Livingston.

Ky ishte rasti i dymbëdhjetë fatal nga rrufeja këtë vit.

“Kjo është një tragjedi e vërtetë”, tha Reina për WABC. “Mendimet dhe lutjet e mia janë me familjen e viktimës dhe të gjithë të lënduarit sonte. Është e vështirë të kuptohet se çfarë ndodhi.”

Një paralajmërim për stuhi të forta u lëshua për disa zonën në mbrëmje.

 

(A.A/BalkanWeb)