Një protestë kundër dërgimit të armëve në Ukrainë u mbajt rreth Portës së Brandenburgut në Berlinin qendror, një ditë pas përvjetorit të një viti të pushtimit rus të Ukrainës. Veprimtaria u organizua pjesërisht nga politikania Sahra Wagenknecht, një anëtare e partisë së majtë Die Linke të Gjermanisë.
Tabelat në protestë mbanin deklarata të tilla si “Negocio, jo përshkallëzo” dhe “Nuk është lufta jonë”. Në faqen e internetit të demonstratës thuhet: “I bëjmë thirrje kancelarit gjerman të ndalojë përshkallëzimin e dërgesave të armëve. Sepse çdo ditë e humbur kushton deri në 1000 jetë më shumë dhe na afron me një luftë të tretë botërore”.
Policia vendosi 1,400 oficerë për të ruajtur qetësinë dhe për të zbatuar ndalimet për uniformat ushtarake, flamujt rusë dhe sovjetikë, këngët ushtarake ruse dhe simbolet e krahut të djathtë. Një zëdhënës i policisë tha se protesta ishte paqësore dhe nuk kishte asnjë shenjë të pranishme të grupeve të krahut të djathtë.
Ministri gjerman i financave, Christian Lindner, reagoi ndaj demonstratës duke postuar në Twitter: “Kushdo që nuk qëndron në krah të Ukrainës është në anën e gabuar të historisë”.
