Kryeministri Edi Rama ka postuar në “X” një reagim pas deklaratave të Byrosë Kombëtare të Hetimit, se nuk ka pasur përplasje mes hetuesve dhe Gardës në Kryeministri.
Reagimi i kreut të qeverisë erdhi vetëm rreth 30 minuta pas reagimit të BKH, ku thuhej se nuk ka pasur përplasje mes hetuesve dhe Gardës në Kryeministri.
Kryeministri Edi Rama, në podcastin “Flasim” ka rrëfyer një episod që sipas tij ka ndodhur te Kryeministri ku tre hetues të bKH kihsin refuzuar të dorëzonin armët sipas rregullores, që është hedhur poshtë nga BKH.
Në postimin në “X”, Rama shkruan se ky ishte rasti më i “ëmbël” i ndodhur, pasi ka shumë episode ku “trimoshat e BKH-së që shfaqin shpesh boshllëqe shqetësuese etike e profesionale – thënë kjo shumë ëmbëlsisht për këtë pjesë të problematikës së sëmundjeve të vjetra në organizmat e drejtësisë së re”.
Rama ka vijuar me faktin që duhet reflektim serioz dhe ndërinstitucional ndërsa shtoi “Nuk mundet kurrësesi të lejojmë që kura te bëhet problem më i madh se sëmundja, duke rrezikuar liritë e të drejtat dhe frymëmarrjen e administratës e të ekonomisë së vendit”.
Postimi:
Qenka përgjigjur publikisht edhe BKH-ja ndaj njërit prej një sërë episodesh të mungesës së etikës profesionale të anëtarëve të asaj trupe, të cilin e ceka sot në podkastin FLASIM, duke folur për simptomat shqetësuese të sëmundjeve të vjetra në organizmat e drejtësisë së re!
Ata kanë cituar ligjin, sipas të cilit mund të mbajnë patllake, kur në fakt unë nuk i kritikova për armëmbajtje pa leje, po për padijen etike dhe ligjore që i shtyu të donin të hynin në kryeministri me patllake siç e thonë edhe vetë në deklaratë.
Sikur të ishte ky një rast i veçuar, padiskutim që nuk do ta kisha cekur në kuadër të qëndrimit të sotëm mbi simptomat e lartpërmendura, por fatkeqësisht ky ishte më i ëmbli i episodeve që munda të gjej, për trimoshat e BKH-së që shfaqin shpesh boshllëqe shqetësuese etike e profesionale – thënë kjo shumë ëmbëlsisht për këtë pjesë të problematikës së sëmundjeve të vjetra në organizmat e drejtësisë së re.
Gjithësesi, po e përsëris, ka ardhur koha e një reflektimi serioz, profesional dhe ndërinstitucional, për të ndarë beben e sapolindur të nga ujërat e pistë, në një proces historik ku duhet të garantojmë suksesin e Reformës në Drejtësi, duke garantuar medoemos pavarësinë e gjyqësorit, po ku po ashtu, nuk mundet kurrësesi të lejojmë që kura te bëhet problem më i madh se sëmundja, duke rrezikuar liritë e të drejtat dhe frymëmarrjen e administratës e të ekonomisë së vendit.
