Vendimi i qeverisë për të kufizuar ndjeshëm muzikën në lokalet e natës dhe ambientet turistike ka shkaktuar reagime të forta nga bizneset dhe komuniteti i artistëve, të cilët e konsiderojnë masën një goditje të re për sektorin e argëtimit dhe turizmit.
Sipas vendimit të ri për menaxhimin e zhurmave, muzika në lokale do të jetë subjekt i monitorimit me matje decibelësh, ndërsa niveli i lejuar është përcaktuar në 45 decibel. Artistët pretendojnë se ky kufizim e bën praktikisht të pamundur zhvillimin e performancave live.
Këngëtari Endri Prifti ka reaguar ashpër ndaj kryeministrit Edi Rama, duke kundërshtuar politikat e reja për muzikën në ambiente publike.
“O Rama, ku e ke parë këtë? Ia nxive jetën këtij populli, ia bëre skëterrë. Kaq shumë do ta shpopullosh këtë vend? Po dëmton turizmin!”, është shprehur ai.
Edhe vëllai i tij, këngëtari Stefi Prifti, ka kundërshtuar vendimin, duke thënë se artistët kishin shpresuar për një zgjatje të orarit të muzikës gjatë sezonit veror, në përputhje me praktikat e vendeve fqinje.
“Ekzistonte një fije shprese se mund të shtyhej pak orari i mbrëmjeve muzikore, sidomos në sezonin e verës. Por thjesht ka qenë iluzion”, shkroi ai.
View this post on Instagram
Sipas Stefi Priftit, kufizimi i nivelit të zërit në 45 decibel e bën thuajse të pamundur muzikën live. “Me nivelin 45 decibel nuk mund të interpretohet live. Është e pamundur”, deklaroi ai, duke shtuar se vendimi prek jo vetëm këngëtarët dhe instrumentistët, por edhe bizneset që investojnë në aktivitetet muzikore.
Artistët argumentojnë se periudha e verës është një nga pak momentet kur kanë mundësi më të mëdha punësimi, pasi sezoni turistik sjell më shumë aktivitete në lokale, hotele dhe zona bregdetare.
View this post on Instagram
“Janë vetëm 35-40 ditë ku ekziston kjo mundësi, nga 15 korriku deri më 20 gusht. Tani po e bëni thuajse të pamundur aktivitetin tonë”, u shpreh Prifti. Kritikat ndaj vendimit lidhen edhe me ndikimin e mundshëm në turizëm, ku sipas artistëve, muzika dhe aktivitetet kulturore janë pjesë e rëndësishme e ofertës për turistët.
Ata i kanë kërkuar qeverisë dhe institucioneve përgjegjëse që ta rishikojnë masën, duke argumentuar se kufizimet e reja rrezikojnë të dëmtojnë një sektor ku punojnë mijëra artistë dhe biznese.
“Mos e paralizoni edhe atë pak gëzim që njerëzit marrin duke konsumuar diçka dhe duke dëgjuar muzikë. Njerëzit kanë nevojë të këndojnë, të kërcejnë dhe të argëtohen në ditët e pushimeve”, është shprehur Stefi Prifti.
